किन मल्टिप्लेक्समा ‘आँधी तुफान २’को एक शोज पनि छैन ?

बारम्बार प्रदर्शन मिति तय गरेर पनि रिलिज हुन नसकेको फिल्म ‘आँधी तुफान २’ आजबाट रिलिज भएको छ भन्ने सुन्दा तपाई अचम्मित पर्नुभयो होला ।  तर, आजबाट रिलिज भएको यो फिल्मको कही कतै चर्चा छैन । निर्माता मौनता श्रेष्ठले गुमनाम रुपमा फिल्म रिलिज गरिदिएका छन् । 

मल्टिप्लेक्समा त यो फिल्मलाई एक शो पनि दिइएको छैन । फिल्मलाई अपकमिङको रुपमा पनि राखिएको थिएन । अर्को फिल्म ‘मनसँग मन’ले भने मल्टिप्लेक्समा सुखद शोज पाइरहेको छ । 

मदन घिमिरेको निर्देशनमा तयार भएको यो  फिल्ममा कनिजका कोइराला, आरती आचार्य, याङ्सु श्रेष्ठ, सन्जित भण्डारी, मुकुन्द थापा, संजय खतिवडा, पुष्कर राउत लगायतका कलाकारको अभिनय छ । 

निर्माता मौनता श्रेष्ठले मल्टिप्लेक्सले शोज नदिएको भन्दा पनि आफूहरूले नै फिल्म नदिएको तर्क गरेका छन् । उनले, आफूहरूको फिल्म सिंगल थिएटर केन्द्रित भएकाले मल्टिप्लेक्सलाई फिल्म नदिएको तर्क गरेका छन् । तर, उनले जे जस्तो तर्क गरे पनि यो फिल्मलाई मल्टिप्लेक्सका संचालकहरुले पत्याएको देखिएन ।