प्रकाश सुपतको डेब्यू फिल्मः भाग्दा भाग्दै कहाँ पुग्ला ‘परदेशी २’ ?

गायकबाट नायक बन्न लागेका प्रकाश सपुत र नायिका केकी अधिकारीको मुख्य भूमिका रहेको फिल्म ‘परदेशी २’लाई फागुणको ५ गतेबाट रिलिज गर्ने तयारीबाट यसका मेकर फेरि पछाडि सरेका छन् । फिल्मको कुनै पनि प्रचार सुरु नभएकाले गर्दा अब यो फिल्म निर्धारित मितिमा नआउने पक्का भैसक्यो । 

तर, दोश्रो पटक पनि पछि हटेर यसका मेकर अर्को बर्षको दशैंलाई ताकिरहेका छन् भन्ने सुनिएको छ । राजेश बंशलको निर्माण र नारायण रायमाझीको निर्देशनमा तयार भएको यो फिल्मलाई दशैं, फागुण ५ बाट पनि पछि सारियो । 

एउटा हिट फिल्मको सिरिजमा निर्मातालाई किन विश्वास नभएको होला ? यो फिल्मबाट गायक प्रकाश सपुतले नायकमा डेब्यू गरेका थिए । श्रोतका अनुसार, यो फिल्म रिलिज नभएसम्म अर्को फिल्म नगर्ने संझौता प्रकाशले फिल्मको टिमसँग गरेका छन् । यसअर्थमा पनि उनको नायक बन्ने धोको पूर्ण रुपमा पुरा हुन यो फिल्मको रिलिज कुर्नुपर्ने हुन्छ । 

फिल्मको सार्वजनिक गीत र टिजरले दर्शकको मन जितेन । यसैले, यसका मेकरलाई अब, अझै स्तरिय प्रचार सामाग्री दर्शकमाझ ल्याउनुपर्ने दबाब छ । आउँदो बर्षको दशैंमा पनि फिल्मको लामो सूची तयार भैसकेको छ । यस्तो अवस्थामा, ‘परदेशी २’का मेकर यसपटक ठूलो समस्यामा परेका छन् ।