सौगातसँगै ‘अगस्त्य’मा मलिका र नाजिरको इन्ट्री

निर्देशक सौरभ चौधरीको सपनाको फिल्म ‘द अनब्रेकेबल अगस्त्य’मा नायक सौगात मल्ल फाइनल भएको खबर आज बाहिरिएको छ ।  तर, यो फिल्मका लागि अन्य २ कलाकार पनि फाइनल भइसकेको श्रोतले मेरो फिल्मलाई बताएको छ । 

यो फिल्मका लागि सौरभले नायिका मलिका महत्तलाई फाइनल गरिसकेका छन् । मलिकाले केही दिन अगाडि निर्देशक लक्ष्मण सुवेदीकी फिल्म पनि साइन गरेकी थिइन् । यो उनको चौथो प्रोजेक्ट हो । यस्तै, फिल्ममा नायक नाजिर हुसेन पनि फाइनल भएको श्रोतले जानकारी दिएको छ । 

सौरभले भने आज नायक सौगात मल्लको नाम मात्र सार्वजनिक गरेका छन् । अरू कलाकारको नाम विस्तारै सार्वजनिक गर्ने तयारी निर्माण पक्षको छ । 

सौरभकै कथा रहेको फिल्ममा प्रकाश मल्ल र अनिष तामाङको लगानी छ । फिल्ममा राजेश श्रेष्ठको छायांकन रहनेछ । डार्क हर्स इन्टरटेन्मेन्टको ब्यानरमा निर्माण हुन लागेको फिल्मलाई काठमाडौं, नवलपरासीको साथमा भारतको गोरखपुर र बनारसमा छायांकन गरिनेछ । 

फिल्मलाई २ च्याप्टरमा बनाउने तयारी सौगातको छ । सौगातले फिल्ममा केही भारतीय कलाकारलाई समेत साइन गर्ने तयारी गरेका छन् । फिल्मको छायांकन बैशाखबाट सुरु हुनेछ । फिल्मलाई एक्सन प्रधान बनाउने तयारी निर्माणपक्षले गरेको छ ।