राखी सावन्तले प्रेमीसँग विवाह गरेपछि धर्म परिवर्तन गरेर नाम फेरिन् !

बलिउड सेलिब्रिटी राखी सावन्तले प्रेमी आदिल खानी दुर्रानीसँग कानुनी विवाह गरेकी छन् । राखी आफैँले सामाजिक सञ्जालमार्फत आफ्नो विवाहको घोषणा गरेकी छिन् ।

लामो समयदेखि यी दुई जना रिलेसनसिपमा रहेका थिए । उनीहरू बेलाबेलामा एकसाथ सार्वजनिक कार्यक्रममा देखिने पनि गरेका थिए । मिडिया रिपोर्टका अनुसार राखीले आदिलसँग विवाह गरेपछि आफ्नो नाम बदलेर फातिमा राखेकी छिन् ।

राखीले आफ्नो सामाजिक सञ्जाल इन्स्टाग्राम मार्फत आदिलसँगको कोर्ट म्यारिज गरेका सार्वजनिक विवाहका तस्बिर अहिले भाइरल बनिरहेका छन् । तस्बिर सेयर गर्दै राखीले लेखेकी छन्, ‘म धेरै खुसी छु र विवाह गरेकी छु । मेरो प्रेम तिम्रो लागि सदाको निस्वार्थ प्रेम हो ।’ राखीको यो पोस्टमा प्रशंसक र साथीहरूले नव विवाहित जोडीलाई बधाई सन्देश दिइरहेका छन् । 

राखीको यो दोस्रो विवाह हो, यसअघि उनले रितेश नामका व्यक्तिसँग विवाह गरेकी थिइन् तर यी दुईको सम्बन्ध लामो समय टिक्न सकेन । राखी सावन्तले पूर्व पति रितेशसँग सम्बन्ध विच्छेद गरेपछि दुर्रानीसँग डेट गर्न थालेकी हुन् । त्यस क्रममा राखीले मैसूरका व्यापारी आदिललाई आफ्नो प्रेमीका रूपमा मिडिया र आफ्ना फ्यानसँग परिचय गराउन थालेकी थिइन् । 

व्यावसायिक कुरा गर्दा राखी पछिल्लो पटकको विवादास्पद टेलिभिजन रियालिटी सो बिग बोस मराठी ४ मा देखिएकी थिइन् । उनी सलमान खानले आयोजना गरेको हिट रियालिटी सो बिग बोस १५ को पनि एक हिस्सा थिइन्, जहाँ उनले आफ्ना पूर्व पति रितेशसँग प्रवेश गरेकी थिइन् । बिग बोस १५ को घरबाट बाहिरिएपछि यो जोडी अलग भएको थियो र राखीले आफ्नो सामाजिक सञ्जालबाट अलग भएको घोषणा गरेकी थिइन् ।

विवाहपछि उनले आफ्नो नाम फातिमा राखिन् । अब यो पूरै प्रकरणमा उनका भाइ राकेशको प्रतिक्रिया आएको छ । राकेश भन्छन्, ‘यसबारे आफूलाई धेरै थाहा छैन तर राखीले जे गरेकी छिन्, सोचेरै गरेको हुनुपर्छ । हामी आशा गर्छौँ कि उनले लिएको निर्णय सही हुनेछ ।' राखी परिवारमा कान्छी भएकी र सुरुदेखि नै धेरै पीडा भोगेकीले सधैँ राखीको चिन्तामा रहेको राकेशले बताए । 

राखी सावन्त लामो समयदेखि आदिल खानसँग डेट गरिरहेकी थिइन् । दुवै जना प्रायः सार्वजनिक रूपमा सँगै देखिएका छन् । अब राखीले आदिलसँगको आफ्नो सम्बन्धलाई नयाँ नाम दिएकी छिन् । रिपोर्टमा विश्वास गर्ने हो भने आदिल राखी भन्दा ६ वर्ष कान्छा र पेशाले व्यवसायी हुन् ।

राखी सावन्त अहिलेसम्म धेरै रियालिटी सोजमा देखा परेकी छिन् । उनले मिडियामा दिने अभिव्यक्तिका कारण चर्चामा आइरहन्छिन् । मिका सिंहसँगको किस विवादका बेला पनि उनी चर्चामा आएकी थिइन् ।