सौगात मल्लको हातमा फिल्म नै फिल्म, के अफर आएका प्रोजेक्ट छाड्दैनन् ?

नेपाली फिल्म क्षेत्र ‘लुट’पछि नायक दयाहाङ राई र सौगात मल्लको वरिपरी घुमिरहेको छ । अझ, फिल्म ‘पशुपति प्रसाद’पछि यो सूचीमा विपिन कार्की पनि थपिएका छन् । फिल्मी संख्या र माग हेर्ने हो भने यी तिनै नायकको वरिपरी नेपाली फिल्म घुमेको छ भन्दा फरक नपर्ला ।

नायक सौगात मल्लले काम गरेका आधा दर्जन बढी फिल्म यो बर्ष रिलिज भए । जसमा, ‘कबड्डी ४ र २ नम्बरी’ सुपरहिट भए ।

यसपछि, फेरि सौगातकै पछि निर्माताहरु दगुर्ने भैहाले । सौगात मल्लले साइन गरेका फिल्मको संख्या मात्र हेर्ने हो भने पनि, अर्को बर्ष दर्शकले उनलाई आधा दर्जन भन्दा बढी पटक हेर्ने पक्का छ ।

सौगात मल्लले फिल्म ‘भगवत् गीता’मा काम गर्दैछन् । उनले, फिल्म ‘हात्तीछाप’ पनि साइन गरिसकेका छन् । सौगातले फिल्म ‘भष्मे डन’मा पनि काम गर्न लागेको खबर छ । पोखराबाट फर्किएलगतै उनले यो फिल्म साइन गर्नेछन् ।

सौगात मल्लले सौरभ चौधरीको निर्देशनमा बन्न लागेको फिल्म ‘अगस्त्य’मा पनि काम गर्ने तयारी गरेका छन् ।

सौगातको हातमा फिल्मको लाइनअप लामो देखिएको छ । आफैले निर्माण तथा अभिनय गरेको फिल्म ‘राधा’ बक्स अफिसमा नचल्दा पनि उनी चम्किएका छन् । उनलाई विशेषगरि, पछिल्लो हिट ‘२ नम्बरी’ले अझै व्यस्त बनाउन मद्दत गरेको छ ।

सौगात मल्ले विगत केही बर्षदेखि अफर आएका अधिकांश फिल्म स्विकार गरेको देखिन्छ । उनी, विगत केही बर्षदेखि प्रोजेक्टमा काम गरेर पैसा कमाउने धुनमा छन् ।