क्यूएफएक्सको चलखेलले रोकेन अनमोललाई, ‘छड्के २’ले फागुण १९ नछाड्ने

Mero Film

पुस १६, २०७९ शनिबार ०९:२५

फागुणको १९ गते नायक अनमोल केसी स्टारर फिल्म ‘छड्के २’लाई रोकेर अर्को फिल्म ‘छक्का पन्जा’ मात्र सोलो रिलिज गर्न खोजेको देशकै ठूलो मल्टिप्लेक्स चेन क्यूएफएक्सको राजनीतिलाई यसको निर्माणपक्षले वेवास्ता गरिदिएको छ । आफूहरुलाई नसोधी फिल्मको प्रदर्शन मिति तय नगर्न भन्दै क्यूएफएक्सको व्यवस्थापन टिमले ठूलो चेन हुनुको घमण्ड मात्र प्रदर्शन गरेको थिएन, फिल्म क्षेत्रमा सिन्डिकेट समेत व्यूताउन खोजेको थियो । तर, निगम श्रेष्ठको निर्देशनमा तयार भएको फिल्म ‘छड्के २’को मेकरले भने फागुण १९ को मिति नछाड्ने पक्का भएको छ । अंग्रेजी नयाँ बर्षको पूर्व सन्ध्यामा सार्वजनिक नयाँ पोष्टरमा प्रदर्शन मिति फागुण १९ मै राखिएको छ ।

फिल्मको नयाँ पोष्टरमा नायक अनमोल केसीसहित अन्य केही कलाकारको भिन्न गेटअप समावेश गरिएको छ । जसले फिल्मप्रति दर्शकको उत्सुकता अझै बढाउने निश्चित छ ।
प्रशान्त गिरी र देवकुमार श्रेष्ठको लगानीमा बनेको यो फिल्ममा अनमोल केसीलाई ग्याङस्टारको अवतारमा देखाइएको छ । फिल्ममा उनको साथमा रविन तामाङले पनि मुख्य भूमिका निर्वाहा गरेका छन् ।

यो फिल्मका वितरक सुनिल मानन्धरले शुक्रबार मात्र क्यूएफएक्सले शो नदिएपनि फिल्मको रिलिज फागुण १९ बाट नसार्ने बताएका थिए । सार्वजनिक नयाँ पोष्टरमा पनि फागुण १९ कै मिति तोकिएपछि अब यो मितिमा यो बर्षकै ठूलो बक्स अफिस भिडन्त हुने देखिएको छ ।