किन सहजै रिलिज हुन सक्दैनन् अनमोलका फिल्म ?

नायक अनमोल केसीले अभिनय गरेको पछिल्लो फिल्म ‘छड्के २’ फागुणको १९ गतेबाट रिलिज हुँदैछ । यो फिल्म रिलिज अगावै फेरि विवाद र चर्चामा छ । उसो त, नायक अनमोल केसीले अभिनय गरेका फिल्म सहजै रिलिज भएका उदाहरण निक्कै कम छन् ।

विशेषगरि, क्यूएफएक्सले यो फिल्म चलाउन आनाकानी गरेपछि फेरि एकपटक चर्चा चुलिएको हो । क्यूएफएक्सले आफूहरुले एक सातामा एउटा मात्र फिल्म चलाउने नीति बनाएको भन्दै यो मितिमा रिलिज हुन लागेको फिल्म ‘छक्का पन्जा ४’ लिइसकेको बताएको छ । यो बिषय अहिले सर्वाधिक विवादमा छ ।

अनमोलको फिल्म ‘ए मेरो हजुर ४’ बैशाख १ गते रिलिज हुँदा पनि साउथको फिल्म ‘केजीएफ २’ रिलिज भएको थियो । यो समयमा पनि साउथको सर्वाधिक चर्चित फिल्मसँग जुध्दा अनमोललाई बक्स अफिसमा सहज भएको थिएन भने शोज पाउन पनि समस्या भएको थियो ।

फिल्म ‘ए मेरो हजुर ३’ रिलिज हुँदा उनका लागि ‘यात्रा’ बाधक बनेको थियो भने फिल्म ‘क्याप्टेन’ रिलिजको समयमा पनि अनमोलसँगको दुश्मनीलाई अगाडि बढाउँदै निर्देशक हेमराज वीसीले आफ्नो फिल्म ‘ब्रेकअप’ रिलिज गरेका थिए ।

अनमोलको अप्ठ्यारो यसैमा सिमित छैन । फिल्म ‘ड्रिम्स’को रिलिजको समयमा फिल्म ‘फूलै फूलको मौसम तिमीलाई’ रिलिज भयो । सो समयमा निर्देशक दिनेश डीसीले अनमोल केसी को हो र भन्दै उनलाई कमजोर आँकलन गरेका थिए ।

अनमोलका फिल्म रिलिजको समयमा बाधै बाधा खुबै आउने गरेका छन् । तर, बाधालाई चिर्दै अनमोलले बक्स अफिसमा छलाङ भने मारेका छन् ।