मल्टिप्लेक्समा ‘डिसेम्बर फल्स’लाई सुखद शोज, ओपनिङ कस्तो गर्ला ?

नायक आर्यन सिग्देल र नायिका उपासना सिंह ठकुरीको मुख्य भूमिका रहेको फिल्म ‘डिसेम्बर फल्स’ भोलि शुक्रवारदेखि देशभरका हलमा रिलिज हुँदै छ ।
यो फिल्मलाई प्रविण झाले निर्देशन गरेका हुन् । फिल्मको ट्रेलर, गीत र टिजरले राम्रै चर्चा कमाइरहेको समयमा रिलिज हुन लागेको फिल्मले दर्शकको साथ पाउने अपेक्षा निर्माता रामप्रसाद रिजालको छ । उनले, यो फिल्मले आफूलाई नाफा दिने विश्वास समेत व्यक्त गर्दै आएका छन् ।

यसैबिच, फिल्मको बुकिङ देशभरका मल्टिप्लेक्समा खुलेको छ । फिल्मलाई मल्टिप्लेक्सले सुखद शोज दिएका छन् । देशकै सबैभन्दा ठुलो चेन भएको क्यूएफएक्सले यो फिल्मलाई देशभर २९ शोज दिएको छ । विशेषगरि, हलमा नयाँ फिल्म नहुनु, पुरानो फिल्मले पनि एक सातामै दम तोड्नुले आर्यनको फिल्मलाई फाइदा भएको देखिन्छ ।
यस्तै, यो फिल्मलाई वान सिनेमाज्ले नयाँ बाँनेश्वर र कालीमाटीमा पनि राम्रो शो दिएको छ । बीग मुभिजमा भने फिल्मले ३ शोज पाएको छ ।

फिल्मले दर्शकको राम्रो साथ पाउन सकेको खण्डमा यसको शोज अझै बढ्ने निश्चित छ । आर्यन सिग्देलका लागि समेत राहत दिने अपेक्षा गरिएको फिल्मको व्यापारले निरन्तर घाटामा रहँदै आएको रिजाल एण्ड रिजाल कम्पनीलाई पनि ठुलै राहत दिनेछ ।