सुवेदीको अनटाइटल प्रोजेक्टमा मलिका अनुबन्धित

 

म्यूजिक भिडियोकी सफल मोडल तथा नायिका मलिका महतले नयाँ फिल्म साइन गरेकी छिन् । उनले, आज निर्देशक तथा संचारकर्मी लक्ष्मण सुवेदीको निर्देशनमा बन्न लागेको नयाँ चलचित्र साइन गरेकी हुन् ।

नायक पल शाहसँग केही फिल्ममा काम गर्ने पक्का भएर पनि विभिन्न परिस्थितका कारण मलिकाले काम गर्न पाएकी थिइनन् । पहिलो फिल्म ‘यात्रा’बाट राम्रै जस पाएकी मलिकाले दोश्रो फिल्मको रुपमा ‘पानीफोटो’मा काम गरेकी थिइन् । तर, यो फिल्म नचलेपछि मलिका कस्तो फिल्ममा काम गर्ने भन्ने बिषयमा दोधारमा थिइन् ।

‘फूलबुट्टे सारी’ गीतको म्यूजिक भिडियोमा अभिनय गरेपछि दर्शकको रोजाइमा परेकी मलिकाले लक्ष्मण सुवेदीको लेखन, निर्माण तथा निर्देशन रहने शीर्षकविहीन फिल्ममा मलिकाले शीर्ष भूमिकामा काम गर्न लागेकी हुन् ।

मन छुने कथा नपाएर फिल्म साइन नगरेको बताउने मलिका प्रमुख कलाकारको रुपमा फिल्ममा अनुबन्ध भएसँगै करिअरलाई कसरी अघि बढाउछिन् हेर्न बाँकी छ ।

यो फिल्ममा अन्य प्रमुख कलाकारका लागि छिट्टै अडिसन गरिने निर्देशक सुवेदीले जानकारी दिएका छन् । अडिसनसँगै मलिकाको जोडी को हुने हो एक महिना पछि थाहा हुने सुवेदीले बताए । यो फिल्मको छायांकन फागुणको पहिलो साताबाट छायांकनमा जानेछ ।

‘ठगराज’ बनाउने तयारी गरेका सुवेदीले तत्काल यो प्रोजेक्टलाई स्थगीत गरेर मलिकासँग नयाँ फिल्ममा काम गर्न लागेका हुन् । दिलाशा क्रियशनको ब्यानरमा लक्ष्मणले यसअघि फिल्म ‘लालजोडी’ बनाएका थिए ।