फागुण ५ मा ‘फूलबारी’ सोलो रिलिज हुने ?

फागूण ५ गतेको मितिमा सबैभन्दा पहिले रिलिज तय गरेको फिल्म थियो ‘परदेशी २’ । ‘परदेशी २’का निर्माताले दशैं छाडेर फागुणको ५ गते रोज्दा यो लोभलाग्दो मितिमा अरु फिल्म आउने तय भएको थिएन ।

तर, पछि यो मितिमा फिल्म ‘लण्डन टू पेरिस’ रिलिज हुने गरि मिति तोकियो । साम्राज्ञी राज्यलक्ष्मी शाहको मुख्य भूमिका रहेको फिल्म आउने भएपछि प्रकाश सपुत र केकी अधिकारी स्टारर ‘परदेशी २’लाई केही समस्या पर्यो ।

पछि, यही मितिमा रामबाबु गुरुङ निर्देशित फिल्म ‘फूलबारी’ पनि आउने पक्का भयो । दयाहाङ राई, विपिन कार्की, प्रियंका कार्की लगायतका कलाकारले अभिनय गर्ने यो फिल्मको टिजर आएपछि भने माहोल बदलिएको छ । साम्राज्ञी स्टारर फिल्मका निर्माताले प्रदर्शन मिति पछि सारिसकेका छन् ।

अब, राजेश बंशलको निर्माण र नारायण रायमाझीको निर्देशनमा तयार भएको फिल्म ‘परदेशी २’का निर्माता पनि यो मितिमा नआउने सोचमा छन् । उसो त, मेरो फिल्मसँग कुरा गर्दै निर्माता बंशलले अहिले नै यो बिषयमा कुरा नभएको बताए । निर्देशक रायमाझी पोखरामा रहेकाले पनि उनी फर्किएपछि निर्णय लिने उनको भनाई छ । तर, अब यो मितिमा ‘परदेशी २’ नआउने पक्का भैसकेको श्रोत बताउँछ ।

फागुणको ५ गते हुन लागेको त्रिपक्षिय भिडन्त अब टरेको छ । रामबाबु गुरुङले फेरि अर्को लोभलाग्दो मिति पाएका छन् ।