‘डिसेम्बर फल्स’को ‘यो के भयो’ गीतमा आर्यन र उपासनाको लोभलाग्दो प्रेम

मेकिङका कारण पौषको १५ गते अर्थात आगामी शुक्रबारदेखि रिलिज हुन लागेको चलचित्र ‘डिसेम्बर फल्स’ चर्चामा छ । चलचित्रको गीत, टिजर, ट्रेलरबाट पनि यो चलचित्रका लागि निर्माता रामप्रसाद रिजालले कुनै संझौता नगरेको देख्न सकिन्छ ।

यसैबिच, चलचित्रको सार्वजनिक ‘यो के भयो’ बोलको गीतको अडियो र भिडियोले दर्शकको ध्यान खिच्ने निश्चित छ । अस्मिता अधिकारी र मनिष ढकालको स्वर, सुशान्त गौतम र अनिल शर्माको शब्द, सुशान्त गौतमकै संगीतमा तयार यो गीतले प्रेमको भाव बोकेको छ ।

चलचित्रको यो गीतलाई कविराज गहतराजले कोरियोग्राफी गरेका हुन् । कविले चलचित्रका मुख्य दुई कलाकार आर्यन सिग्देल र उपासना सिंह ठकुरीको जोडीलाई उत्कृष्ट तरिकाले फिचरिङ गरेका छन् ।

गीतको भिडियोमा आर्यन र उपासनाको लोभैलाग्दो केमेष्ट्री देखाइएको छ । साथमा, भिडियोको छायांकन, लोकेशन पनि उत्कृष्ट छ ।

चलचित्रमा शिवहरि पौडेल, सलोन बस्नेत, नागेन्द्र रिजाल, नरेश भट्टराई, शिशिर राना लगायतका कलाकारको अभिनय छ ।

प्रविण झाको निर्देशनमा तयार भएको चलचित्रमा महेश गुप्ताको छायांकन, विपिका खनालको कथा, श्री श्रेष्ठको एक्सन, केदार भुषाल र प्रतिक पौडेलको पटकथा तथा संवाद, बनिष शाहको सम्पादन छ ।