आयुष्मान र प्रियंकाः सँगसँगै, साथसाथै

नायक आयुष्मान देशराज जोशीको करिअर अपेक्षाकृत रुपमा अघि बढेन । फिल्म ‘चपली हाइट २’मा उनले गरेको कामको दर्शकले तारिफ गरे । यसपछि उनी फिल्म क्षेत्रमा बलियो रुपमा अघि बढ्ने अपेक्षा गरिएको थियो । तर, प्रेम जीवनमा अगाडि बढेपछि आयुष्मान करिअर भन्दा नायिका प्रियंका कार्कीसँग बढी केन्द्रित भए ।

प्रियंकासँग बिहे गरेर छोरीलाई समेत जन्म दिएपछि आयुष्मान फेरि कला क्षेत्रमा बलियो बन्ने कोशिशमा छन् । उनी मात्र होइन, नायिका प्रियंका कार्की पनि फिल्म क्षेत्रमा बलियो स्थान बनाउने दाउमा छिन् । तर, प्रियंका र आयुष्मानको प्रेम र बैबाहिक जीवन मात्र होइन करिअर पनि सँगसँगै अगाडि बढेको छ ।

बुधबार र बिहिबार फिल्म र म्यूजिक भिडियोका २ सामाग्री सार्वजनिक भए । जसमा प्रियंका र आयुष्मान नै जोडी छिन् । फिल्म ‘चि मुसी चि’मा प्रियंका र आयुष्मान नै जोडीको रुपमा देखिएका छन् । यता, देविका बन्दना र कुमार सानुको स्वरमा समावेश ‘तिम्रो मायाको सागरमा’ बोलको गीतमा पनि प्रियंका र आयुष्मान नै छन् ।

यो जोडी एकसाथ सँगसँगै अगाडि बढिरहेको छ । प्रियंका र आयुष्मानको प्रेमले दर्शकको राम्रै साथ पनि पाइरहेको छ ।