आर्यनसँग विशालको सहकार्य ?

नायक आर्यन सिग्देल फिल्म ‘डिसेम्बर फल्स’को प्रचारमा निक्कै व्यस्त छन् । यो फिल्म पौषको १५ गतेबाट रिलिज हुँदैछ । यसैबिच, आर्यनले निर्देशक विशाल भण्डारीको नयाँ फिल्ममा काम गर्न लागेको खबर पनि चुलिएको छ । तर, यो बिषयमा आर्यन र विशालले केही पनि बोलेका छैनन् ।

तर, बुधबार फिल्म ‘डिसेम्बर फल्स’को प्रचारका क्रममा ‘कमेडी क्लब विथ च्याम्पियन्स’को सेटमा आर्यन पुग्दा विशालले यसको संकेत भने दिएका छन् । आर्यनसँगको भिडियो स्टोरीमा पोष्ट गर्दै विशालले यसको संकेत दिएका हुन् ।

यसअघि कुनै पनि कलाकार विशालको शोमा प्रचारका लागि पुग्दा उनले कार्यक्रम प्रशारण हुनु अगाडि नै फोटो वा भिडियो सामाजिक संजालमा पोष्ट गरेको देखिदैनथ्यो । तर, यसपटक भने उनी आर्यनलाई लिएर उत्साहित छन् ।

विशालले बनाउन लागेको नयाँ फिल्मको सिक्वेल समेत बन्ने वुझिएको छ । विशाल चाडै नै एकसाथ २ वटा फिल्म घोषणाको तयारीमा छन् । यसका लागि उनको आर्यनसँग कुराकानी अघि बढिरहेको वुझिएको छ ।

लभ स्टोरी फिल्ममा जमेका आर्यन र प्रेमकै कथामा फिल्म बनाउन तम्सिएका विशालको सहकार्य भएको खण्डमा पक्कै पनि त्यसले दर्शकमा उत्साह भने थप्ने छ ।