‘फूलबारी’को टिजरमा विपिन र अरुणाको प्रेम

निर्देशक रामबाबु गुरुङको निर्देशनमा तयार भएको फिल्म ‘फूलबारी’को पारिवारिक कथा बोल्ने टिजर सार्वजनिक गरिएको छ । २ मिनेट २ सेकेन्ड लामो यो टिजरमा फिल्मका अधिकांश पात्र अटाएका छन् । फिल्ममा नायक विपिन कार्की र कलाकार अरुण कार्की दम्पत्तीको भूमिकामा देख्न सकिन्छ ।

यो फिल्ममा विपिन कार्की, अरुणा कार्की, दयाहाङ राई, प्रियंका कार्की, गौमाया गुरुङ, शिल्पा मास्के, अनुपम शर्मा, सोमनाथ खनाल, मनिष ढकाल, लोकेन्द्र लेखक लगायतका कलाकारको अभिनय हेर्न सकिन्छ । यो फिल्मले अभिभावक र सन्तानबिचको कथा भन्नेछ । फिल्ममा उपेन्द्र सुब्बा र कमल किशोर मलपानीको कथा छ । जोश हेरुमको छायांकनमा तयार भएको फिल्ममा कालिप्रसाद बाँस्कोटा र अनुपम शर्माको संगीत, निमेष श्रेष्ठको सम्पादन छ ।

फिल्मको टिजरमा कालिप्रसादको स्वरमा समावेश एक गीतलाई फिल्मको कथासारमा समावेश गरिएको छ । यो गीतसँगै देखाइएका दृश्यले फिल्मको कथा दर्शाउने कोशिश गरेको छ । यो फिल्म फागुणको ५ गतेबाट रिलिज हुँदैछ ।

फिल्ममा मणिराम पोखेल कार्यकारी निर्माताको रुपमा छन् भने मनिष ढकाल निर्माताको रुपमा छन् । रामबाबुले निर्देशन गरेको फिल्म ‘कबड्डी ४’ले यो बर्ष व्यापारिक रेकर्ड नै राखेको थियो । फिल्म ‘फूलबारी’बाट पनि व्यापारिक सफलताको आशा राख्न सकिन्छ ।