दर्शकले भने झै के ‘डिसेम्बर फल्स’बाट आर्यन यूग फर्किएला ?

नेपाली फिल्म क्षेत्रमा अहिले अनमोल केसी, प्रदीप खड्का जस्ता चकलेटी यूवा स्टारहरुको दबदबा छ । यी कलाकारहरुले आर्यन सिग्देल, जीवन लुइटेल जस्ता चकलेटी स्टारहरुको दबदबालाई अहिले ओझेलमा पारेका छन् । जीवन लुइटेल र आर्यन सिग्देलपछि नेपाली फिल्म क्षेत्रमा उदाएका नयाँ यूवा स्टारहरु दर्शकको दिमागमा छन् ।

उसो भए के अब आर्यन सिग्देलको यूग फेरि फर्किन सक्दैन होला ? फिल्म ‘डिसेम्बर फल्स’को ट्रेलर सार्वजनिक भएपछि धेरै दर्शकमा आर्यन यूग फर्किने आशा पलाएको छ ।

भ्यूज अपेक्षित नपाएपनि फिल्मको ट्रेलरले प्रतिक्रिया भने गज्जबको पाएको छ । यसले पनि आर्यन सिग्देल र उपासना सिंह ठकुरी स्टारर फिल्मका मेकरलाई केही हदसम्म राहत पक्कै भएको होला ।

फिल्म ‘किस्मत’बाट फिल्म क्षेत्रमा प्रवेश गरेपछि आर्यनले करिब एक दशक यो क्षेत्रमा राज गरे । यूवादेखि पाका उमेरका मानिसहरु उनका फ्यान थिए । आर्यनलाई लभ स्टोरी फिल्ममा दर्शकले निक्कै मन पराएका थिए । तर, फिल्म रोजाई र स्टारडम जोगाउने कुरामा चुकेपछि आर्यनको क्रेज खस्कियो ।

आर्यन फेरि पनि दर्शकको उस्तै साथ पाउन चाहन्छ, जुन उनले केही बर्ष अगाडि पाएका थिए । फिल्मको ट्रेलरमा प्रतिक्रिया दिन चाहने अधिकांश दर्शकले आर्यनको यूग फेरि फर्किने अपेक्षा गरेका छन् ।

यसका लागि यो फिल्म चल्न आवश्यक छ । फिल्मका निर्माता रामप्रसाद रिजालले भने जस्तै फिल्मले ९ करोड बढीको ग्रस कलेक्शन गरेको खण्डमा आर्यनलाई पुरानो क्रेज फर्काउन सहज हुनेछ । तर, यो फिल्मले दर्शकबाट उत्कृष्ट प्रतिक्रिया पाउन आवश्यक छ । आर्यन आफै पनि यो फिल्मबाट उच्च आत्मविश्वास देखाइरहेका छन् ।