केकी अधिकारीः कमजोर स्टारडम, तर भाग्यमानी नायिका

नायिका केकी अधिकारी आज आफ्नो जन्मदिन मनाउँदैछिन् । केकीले आफ्नो जन्मदिन फिल्म ‘प्रसाद २’को सेटमा मनाउँदैछिन् । यो फिल्मको छायांकन सुरु भएको केही दिन मात्र भयो । नेपाली फिल्म क्षेत्रमा नायिका केकी अधिकारीको डेब्यू ‘स्वर’बाट भयो । यो फिल्मबाट डेब्यू गरेपनि केकी अधिकारीलाई सुपरहिट फिल्मको पर्खाई भने लामो समयसम्म लिनु पर्यो । फिल्म ‘छ माया छपक्कै’ मात्र केकीको पहिलो सुपरहिट फिल्म बनेको थियो । त्यो अघि केकीले अभिनय गरेका २५ वटा फिल्म कुनै औषत चले भने अधिकांश असफल रहे ।

केकी अधिकारी सामाजिक संजाल र मिडियामा सधै नै चर्चामा रहन्छिन् । विशेषगरि, उनको बोल्ने शैलीका कारण उनी मिडियाको खोजीमा पर्छिन् । तर, हलमा भने उनका लागि दर्शकले मोह खासै देखाएको पाइदैन । किनकी, केकीले काम गरेका अधिकांश फिल्म असफल हुनुको कारण पनि यही हो ।

केकीको बक्स अफिसमा स्टारडम कमजोर छ । तर, उनी भाग्यमानी नायिका हुन् । फिल्म सफल होस् या असफल, त्यसले उनलाई खासै फरक पार्दैन । किनकी, उनको हातमा फिल्मको अभाव कहिले पनि भएन । यो बर्षमात्र उनी अभिनित फिल्म ‘झिँगे दाउ’ हिट भयो । यसले, केकीलाई ठूलो राहत त दियो नै । केकीको हातमा फिल्म ‘प्रसाद २’ पनि आइपुग्यो ।

नम्रता श्रेष्ठदेखि ऋचा शर्मा हुँदै सुरक्षा पन्तसम्म पुगेको फिल्मको टिम अन्ततः केकीमा आएर अड्कियो । यसर्थ, फिल्म क्षेत्रमा केकीको भाग्य बलियो छ । केकीको अभिनयको तारिफ भने सधै नै हुने गर्दछ । यहीकारणले पनि केकी फिल्म क्षेत्रमा मेकरको प्रिय बनेकी हुन् ।

आज आफ्नो जन्मदिन मनाइरहेकी सुन्दर नायिकाले यो बर्ष नै बिहे गरिन् । केकीलाई जन्मदिनको धेरै धेरै शुभकामना ।