अध्यागमनले आस्थालाई अमेरिका प्रबेश गर्न किन रोक्यो ?

गायिका आस्था राउतलाई ड्यालस अध्यागमनले नेपाल फिर्ता पठाइदिएको छ । साङ्गीतिक कार्यक्रममा लागि उनी ५ दिन अगाडि अमेरिका उडेकी थिइन् । पर्यटक भिसामा साङ्गीतिक कार्यक्रम गर्न नपाइने कारण देखाएर आफूलाई अमेरिका प्रवेशमा रोक लगाइएको आस्थाले बताएकी थिइन् ।

आस्थाले यसअगाडि पनि सन् २०१७, २०१८ र २०१९ मा भिजिट भिसामै कार्यक्रम गरेकी थिइन् । तर, यो कुरामा पनि अध्यागमनका कर्मचारीले पोजेटिभ जवाफ नदिएपछि उनी विमानस्थलबाटै नेपाल फर्किएकी हुन् ।

उनलाई पी ३ भिसामै अमेरिका आउन भनिएको छ । आस्थाले दूतावासमा गएर पुनः पी ३ भिसाको विषयमा काउन्सिलरसँग कुरा गर्ने बताएकी छिन् ।

अङ्ग्रेजी नयाँ वर्षको अवसर पारेर पेन्सिलभोनियाको लानकास्टरमा उनी नेपाली समुदायले आयोजना गरेको कार्यक्रममा भाग लिन अमेरिका उडेकी थिइन् ।