साम्राज्ञीको बर्थ डेमा ह्यारी कि प्यारीको प्रदर्शन मिति घोषणा

नायिका साम्राज्ञी राज्यलक्ष्मी शाहको जन्मदिनको अवसर पारेर फिल्म ह्यारी कि प्यारीको प्रदर्शन मिति घोषणा गरिएको छ ।

यो फिल्मलाई अब माघको २० गतेबाट रिलिज गर्ने तयारी यसको निर्माणपक्षले गरेको छ । यसअघि यो फिल्मलाई मंसिरमा रिलिज गर्ने तयारी गरिएको थियो ।

यो फिल्मको पोष्टरमा मुख्य कलाकारद्धय साम्राज्ञी र कलाकार जितु नेपाललाई समावेश गरिएको छ । कमेडी जनरामा यो फिल्म निर्माण गरिएको छ । सार्वजनिक फरक ३ पोष्टरले दर्शकको मनमा कौतुहलता जगाउन सक्छ ।

बीआर प्रोडक्शनको प्रस्तुतिमा तयार भएको फिल्ममा बिजय बराल, लक्ष्मी गिरी, सुवास गजुरेल, नरेश पौडेल, रञ्जना भट्टराई, समीक्षा पौडेल, रमेश अधिकारी, डिल्लिराम खनाल लगायतको अभिनय छ । नायिका रेखा थापा फिल्ममा विशेष भूमिकामा छिन् ।

डाक्टर कपिल रिजालको प्रस्तुतिमा तयार भएको फिल्ममा सुदिप बराल, गिरिराज घिमिरे, कपिल रिजाल र अभिमन्यू निरवीको पटकथा तथा संवाद छ । फिल्ममा कपिल रिजालको कथा तथा निर्देशन छ । सुदीप बरालको छायांकन रहेको फिल्ममा अर्जुन जीसीको सम्पादन छ ।