आर्यनका लागि लक्की बन्लिन् त उपासना ?

नायिका उपासना सिंह ठकुरीले काम गरेका तिनै वटा फिल्म चले । यी तिन फिल्मध्ये २ नम्बरीको व्यापार धेरैका लागि अप्रत्याशित नै थियो । यो फिल्म पनि चलेपछि नेपाली फिल्म क्षेत्रमा उपासना लक्की नायिका हुन् भन्ने चर्चा चलिरहेको छ ।

हुन पनि उपासनाले तिन वटा हिट फिल्म दिएपछि उनको चर्चा हुनु स्वभाविक नै हो । उनै, उपासनाले अभिनय गरेको नयाँ फिल्म डिसेम्बर फल्स पौषको १५ गतेबाट रिलिज हुँदैछ ।

यो फिल्ममा उपासनाको जोडीको रुपमा आर्यन सिग्देलले काम गरेका छन् । आर्यनको करिअरमा हिट फिल्म नभएको लामो समय भैसकेको छ । आर्यनका लागि यो फिल्म चल्न आवश्यक छ । आर्यन पनि यो फिल्मका लागि दिनरात नभनी मिहिनेत गरिरहेका छन् । फिल्मका निर्माताले पनि पानी जसरी फिल्मका लागि पैसा बगाएका छन् ।

उसो भए, के यो फिल्मले आर्यनको करिअर जोगाउला त ? कतिपयले भने उपासना सिंह आर्यनका लागि लक्की हुने अपेक्षा गरेका छन् । निरन्तर हिट फिल्म दिइरहेकी उपासना यो फिल्म चल्यो भने आफ्ना लागि मात्र नभएर आर्यनका लागि पनि लक्की साबित हुनेछिन् ।