‘पासो’ मंसिर १६ बाट रिलिज हुने, रिस्ता र सुनिशाको सस्पेन्स भूमिका

मंसिर ४ मा चुनावी चासो, मंसिर १६ मा पासो भन्ने नारा सार्वजनिक गर्दै नायिका रिस्ता बस्नेत केन्द्रिय भूमिकामा रहेको फिल्मको पोष्टर सार्वजनिक गरिएको छ । यो फिल्म अब मंसिरको १६ गतेबाट देशभरका हलमा रिलिज हुनेछ । फिल्ममा आर.बी पुनको लेखन तथा निर्देशन छ । भगवान भुजेल यो फिल्मका निर्माता हुन् ।

बी.आर इन्टरटेन्मेन्ट प्रा.लीको ब्यानरमा निर्माण भएको यो फिल्ममा बसन्त घिमिरे, अनु मुस्कान, अनुराग ढुंगाना, सरस्वती गुरुङ सह–निर्माताको रुपमा छन् ।

कन्टेन्ट थ्रिलर कथामा निर्माण भएको यो फिल्ममा रिस्ता बस्नेत, सुनिशा बजगाँई, रामकुमार बास्ताकोटी, प्रतिक दुलाल र प्रनव आकाशको अभिनय छ ।

फिल्मले दुई अत्यन्त मिल्ने साथीलाई एक अज्ञात अपराधिक समुहले अपहरण गरेपछि उनीहरुले बाँच्नका लागि गरेको संघर्षको कथालाई प्रस्तुत गरेको छ । फिल्म हेर्दा दर्शकको मनमा कौतुहलता जागिरहने निर्देशक पुनको भनाई छ ।
यसैविच, यो फिल्ममको नेट कलेक्शनको १५ प्रतिशत रकम धादिङमा निर्माण हुन गइरहेको ‘जीवन विज्ञान’ धाम निर्माणार्थ प्रदान गरिने जानकारी समेत यसका निर्माता भगवान भुजेलले गराएका छन् ।

रिच इन्टरटेन्मेन्टले यो फिल्मलाई काठमाडौंमा र एफडी कम्पनीले मोफसलमा वितरण गर्नेछ ।