साम्राज्ञी र प्रियंकाका २–२ वटा फिल्म, दर्शक तान्न नसके करिअर संकटमा

नेपाली फिल्मले ७ महिनामा सुखद कमाई गरिरहेको परिप्रेक्षमा अब रिलिज हुन लागेका फिल्मले कस्तो व्यापार गर्छन् भन्ने अनुमान हुन थालेको छ । मंसिर महिनामा सुस्ताएका निर्माताहरु पौषबाट फेरि जुरमुराउनेछन् । नेपालमा बलिउडका स्टार र नाम चलेका कलाकारका फिल्मले समेत गतिलो व्यापार गर्न नसकेको अवस्थामा राम्रो नेपाली फिल्म चल्नेमा अब शंका गर्नु पर्दैन ।

यो बर्ष नेपाली फिल्म क्षेत्रका २ नायिकाको २–२ वटा फिल्म रिलिज हुँदैछ । कुनै समयकी नम्बर १ नायिका प्रियंका कार्की यो बर्ष २ वटा फिल्ममाफर्त दर्शकमाझ आउँदैछिन् । हुनत, यो बर्ष उनी अभिनित ‘लक्का जवान’ रिलिज भैसकेको छ । तर, व्यापारिक रुपमा यो फिल्मले सफलता कमाउन सकेन । यसैले, प्रियंकाका लागि बाँकी २ फिल्म महत्वपूर्ण छन् ।

प्रियंका अभिनित ‘चि मुसी चि’ पौषको १५ गते रिलिज हुँदैछ । यस्तै, उनी अभिनित अर्को फिल्म ‘फूलबारी’ फागुणको ५ गते रिलिज हुँदैछ ।

यस्तै, फिल्म ‘रातो टिका निधारमा’बाट सुपरफ्लप भएकी नायिका साम्राज्ञी राज्यलक्ष्मी शाहको पनि यो बर्ष २ वटा फिल्म रिलिज हुँदैछ । उनी अभिनित फिल्म ‘ह्यारी कि प्यारी’ माघको २० गतेबाट रिलिज हुँदैछ । यस्तै, उनी अभिनित अर्को फिल्म ‘लण्डन टू पेरिस’ फागुणको ५ गतेबाट रिलिज हुँदैछ । साम्राज्ञीलाई यो बर्ष चम्किनका लागि यी दुबै फिल्म चल्न आवश्यक छ । किनकी, निरन्तर खस्किदो करिअरलाई उठाउन उनले यो बर्ष बक्स अफिसमा आफ्नो जादु देखाउन आवश्यक छ ।

प्रियंका र साम्राज्ञीका लागि यो बर्ष विशेष छ । यो बर्ष स्वस्तिमा खड्का, पूजा शर्मा जस्ता नायिकाहरु असफल भैसकेका छन् ।