‘अवतार २’को ट्रेलर रिलिज, दर्शकले साढे ३ घन्टा हलमा बिताउनुपर्ने

विश्वले नै प्रतिक्षा गरिरहेको हलिउड फिल्म ‘अवतार २’को ट्रेलर सार्वजनिक भएको छ । यो फिल्म डिसेम्बर १६ तारिखबाट विश्वभर रिलिज हुँदैछ । नेपालमा समेत यो फिल्मलाई लिएर दर्शकको प्रतिक्षा उच्च छ । फिल्म ‘अवतार’ले विश्व बजारबाट सर्वाधिक कमाई गर्ने फिल्मको रेकर्ड राखेको थियो । पछि, यो रेकर्डलाई अन्य हलिउड फिल्मले तोडेका थिए ।

जेम्स क्यामरुनको निर्देशनमा तयार भएको यो फिल्ममा साम वार्थिङ्टन, जोय साल्दानाको मुख्य भूमिका छ । यसपटक, निर्देशकले फिल्ममा यी दुई मुख्य कलाकारका बालबच्चालाई समेत देखाएका छन् । पृथ्वीबाट पाण्डोरा ग्रहमा पुगेका मानिसका सेना र आदिवासीविचको लडाई नै यो फिल्मको मुख्य कथा हो ।

निर्देशकले यसपटक अधिकांश दृश्य पानीमा खिचेका छन् । फिल्मको कुल लम्बाई ३ घन्टा १० मिनेट रहेको बताइएको छ ।