अडिसनबाट छानिएकी कृष्टिना, ‘प्रेमगीत ३’ चल्दा किन चलिनन् ?

‘प्रेमगीत ३’ले बक्स अफिसमा सुखद कमाई गर्यो । नेपाली बक्स अफिसमा यो फिल्मको व्यापारले निर्मातालाई खुशी बनायो । तर, दुःखका साथ भन्नुपर्छ यो फिल्म बम्पर हिट भएपनि यसकी नायिका कृष्टिना गुरुङको चर्चा भने भएन । कृष्टिना ती नायिका हुन्, जसलाई निर्देशक सन्तोष सेन र उनको टिमले अडिसनबाट छानेको थियो ।

तर, अडिसनबाट बेष्ट भनेर छानिएकी कृष्टिनाले फिल्म चलेपछि नेपाली फिल्म क्षेत्र र मिडियाबाट गतिलो प्रतिक्रिया पाइनन् । बरु, फिल्ममा कृष्टिना रुँदा दर्शक हाँसे, कृष्टिनाको संवादले दर्शकलाई निराश बनायो ।

‘प्रेमगीत’का तिनै वटा सिरिज सुपरहिट छन् । तर, यसको तिन सिरिजमध्ये पहिलो सिरिजकी नायिका पूजा शर्मा बाहेक अरु हिट हुन सकेनन् । दोश्रो सिरिजकी नायिका अश्लेषा ठकुरी पनि चलिनन् । कृष्टिनाको संकेत पनि त्यस्तै छ ।

नेपाली फिल्म क्षेत्रले यो बर्ष सुखको श्वास फेरिरहेको छ । तर, फिल्म हिट भएपनि कलाकार हिट भने नसकेका अन्य फिल्म पनि छन् ।