अनमोलको ‘छड्के २’ फागुण १९ बाट रिलिज हुने

नेपाली फिल्मका मेकरका लागि फागुणको ५ र फागुणको १९ गते आँखामा नै बसेको छ । फागुणको ५ गते ३ वटा फिल्मको प्रदर्शन पक्का भैसकेको छ । अब, फागुणको १९ गते ५ वटा फिल्म रिलिज हुने पक्का भएको छ । यदि, भोलीका दिनमा कुनै फिल्मको प्रदर्शन मिति पोष्टपोन्ड भएन भने ५ फिल्म मेकरले फागुण १९ लाई रोजिसकेका छन् ।

यसअघि यो मितिमा ‘छक्का पन्जा ४, वर एन्ड बधु, परस्त्री र बुलाकी’ आउने पक्का भैसकेको थियो । अब, यही मितिमा नायक अनमोल केसीको मुख्य भूमिका रहेको फिल्म ‘छड्के २’ पनि रिलिज पक्का भएको छ । यसको निर्माणपक्षले आज पोष्टर सार्वजनिक गर्दै फागुण १९ गतेलाई प्रदर्शन मिति तय गरेको हो ।

निगम श्रेष्ठको लेखन तथा निर्देशनमा तयार भएको यो फिल्मलाई ग्याङस्टारको कथामा निर्माण गरिएको छ । लभस्टोरी फिल्ममा रुचाइएका अनमोललाई दर्शकले पहिलो पटक ग्याङस्टारको अवतारमा देख्न पाउनेछन् ।

फिल्ममा प्रशान्त गिरी र देवकुमार श्रेष्ठको लगानी छ । निर्भान फिल्म स्कुल र लक्ष्मण काफ्ले फिल्मका कार्यकारी निर्माता हुन् ।