प्रदीप भट्टराईः हिट फिल्मका मेसिन

शुक्रबारदेखि रिलिज भैरहेको फिल्म ‘महापुरुष’ले बक्स अफिसमा बम्पर व्यापार गरेपछि यसका निर्देशक प्रदीप भट्टराई उत्साहित छन् । ३ बर्ष लगाएर बनाएको फिल्मले दर्शकको साथ पाउँदा प्रदीप आफूहरुको मिहिनेत सफल भएको ठान्छन् ।

तर, यसो भन्दै गर्दा प्रदीपले निर्देशन गरेका ४ वटा फिल्म नै बक्स अफिसमा हिट छन् । उनले बनाएको पहिलो फिल्म ‘जात्रा’ हिट भयो । अर्को फिल्म ‘शत्रु गते’ले बक्स अफिसमा १० करोड माथिको ग्रस कलेक्शन गर्दै सुपरहिट भयो ।

फिल्म ‘जात्रै जात्रा’ पनि बक्स अफिसमा हिट भयो । उनै, प्रदीपको चौथो फिल्म ‘महापुरुष’ पनि बक्स अफिसमा हिट हुने लाइनमा छ । प्रदीपले निर्देशन गरेका चारै वटा फिल्म सुपरहिट भएपछि उनलाई हिट फिल्म बनाउने निर्देशक भन्न सकिन्छ । प्रदीपले निर्देशन गरेकामध्ये सबैभन्दा धेरै प्रशंसा पाएको फिल्म ‘महापुरुष’ हो ।

यतिसम्म कि, मह जोडीले काम गरेका पछिल्ला ३ फिल्ममध्ये २ फिल्म हिट छन् र ती फिल्मलाई प्रदीपले नै निर्देशन गरेका छन् । प्रदीपविना मह जोडीले काम गरेको फिल्म ‘दाल भात तरकारी’ अपेक्षित चल्न सकेन ।

यसर्थ, आजका दिनमा प्रदीपका फिल्ममा काम गर्न जोकोही कलाकार पनि आतुर छन् । सामाजिक कथावस्तुलाई सरल तरिकाले प्रस्तुत गर्ने भएकाले पनि प्रदीपका फिल्म रुचाइएका छन् ।