वधाईः बक्स अफिसमा दयाहाङको ह्याट्रिक

कार्तिकको ४ गतेबाट रिलिज भएको फिल्म ‘के घर के डेरा’ले सुखद व्यापार गरेसँगै यसका मुख्य नायक दयाहाङ राईले बक्स अफिसमा ह्याट्रिक गरेका छन् । यो वर्ष दयाहाङले अभिनय गरेका तीन वटा फिल्म बक्स अफिसमा सफल भएका छन् ।

उनले अभिनय गरेको फिल्म ‘कबड्डी ४’ले त बक्स अफिसमा ऐतिहासिक रेकर्ड नै बनायो । फिल्मको व्यापार २२ करोड ग्रस रहेको निर्माण पक्षको दाबी छ ।

यसपछि, दयाहाङ अभिनीत अर्को फिल्म ‘२ नम्बरी’ पनि बक्स अफिसमा चम्कियो । यो फिल्मले पनि नाफा कमाएपछि दयाहाङप्रति दर्शकको विश्वास अझै उस्तै छ भन्ने प्रमाणित भयो ।

उनै, दयाले अभिनय गरेको अर्को फिल्म ‘के घर के डेरा’ले पनि बक्स अफिसमा सुखद कमाई गरिरहेको छ । पहिलो साता सुखद रहेको फिल्मको व्यापार दोस्रो साताको शुक्रवार पनि कमजोर बनेको छैन । यसरी हेर्दा, दयाका तिन फिल्म यो वर्ष हिट भएका छन् ।

अझ, रोचक कुरा त के पनि छ भने, दया अभिनीत अर्को फिल्म ‘फूलबारी’ फागुनको ५ गतेबाट रिलिज हुँदै छ । यो फिल्म पनि बक्स अफिसमा चम्कने विश्लेषण धेरैको छ । यस अर्थमा, यो वर्ष दयाहाङमय हुने निश्चित जस्तै छ ।