‘महापुरुष’को बुकिङ खुल्यो, बम्पर ओपनिङको अपेक्षा

फिल्म ‘महापुरूष’ ले गत आइतबार काठमाडौंमा वर्ल्ड प्रिमियर गरेर ‘मोफसल प्रिमियर’ अन्तर्गत मंगलवार चितवनस्थित सिनेप्लेक्समा र बुधबार पूर्वी नेपालको इटहरीमा प्रिमियर गरेको छ ।

वर्ल्ड प्रिमियर गरेर वाहवाही बटुलीरहेको फिल्म ‘महापुरूष’ ले चितवनमा भएको प्रिमियरमा चार सय दर्शकले फिल्म हेरेका छन् । वर्ल्ड प्रिमियरमा सेलिब्रेटीहरूले खुलेर प्रसंशा गरेको फिल्मले मोफसलमा सञ्चारकर्मी र फिल्मप्रेमीलाई मध्यनजर गर्दै दुई स्थानमा संवत यो पहिलो पटक प्रिमियर गरेको हो ।

कार्यकारी निर्माता रविन्द्रसिंह बानियाँले भने, ‘प्रिमियरबाट पाएको प्रतिक्रिया उत्साहजनक छ । चितवनमा प्रिमियर हुँदा स्थानीय पनि उत्साहित हुनुहुन्छ । हामीले मोफसलमा देखाएका हौँ’।

‘मोफसलबाट हामीले व्यावसायिक सफलता त लिइरहेका छौं । तर त्यहाँका सञ्चारकर्मी र फिल्मकर्मीलाई सफलतामा समेट्न सकेका छैनौं । हामीले मोफसलमा बजारलाई झनै बलियो बनाउन दुई स्थानमा प्रिमियर गरेका हौं,’ बानियाँले भने ।

चितवन प्रिमियरमा निर्माता बानियाँसँगै निर्देशक तथा लेखक प्रदीप भट्टराई सहभागी रहेका थिए। आफ्नो फिल्मको मोफसलमा प्रिमियर गर्ने रहर पूरा भएको निर्देशक भट्टराईले बताए । ‘मेरो फिल्म मोफसलमा पनि प्रिमियर गरौँ भन्ने चाहना थियो । त्यो यसपटक पूरा भयो’, निर्देशक भट्टराईले भने । फिल्मकै काममा अल्झिने हुँदा मोफसलमा यसअगाडि यस्ता इभेन्ट गर्न नसकिएको उनले बताए ।

बुधवार इटहरीमा पूर्वाञ्चलका दर्शकलाई लक्षित गर्दै इटहरीमा रहेको इलाइट सिनेमामा फिल्मको प्रिमियर गरेको हो । इटहरीमा हुने प्रिमियरमा कार्यकारी निर्माता बानियाँ र निर्देशक भट्टराईसँगै अरुण क्षेत्री र अन्जना बराइलीसमेत सहभागी रहेका थिए । कात्तिक ११ अर्थात भोली शुक्रबारबाट प्रदर्शनमा आउने फिल्मको शो समयसमेत मल्टिप्लेक्सहरूमा प्रकाशित हुन थालेको छ । फिल्मको अनलाइन टिकेट बुकिङ गर्न सकिनेछ ।

बुधबारबाट मल्टिप्लेक्सले बुकिङ खुला गरेको फिल्मले मल्टिप्लेक्स हलमा उच्च शो पाएको छ । नेपालको सबैभन्दा ठूलो मल्टिप्लेक्स चेन क्युएफएक्सले मात्रै देशभरका आफ्ना आउटलेटमा ४२ शोज दिएको छ । यस्तै, वान सिनेमाजले ९, रञ्जना सिनेप्लेक्सले चार, बिग मुभिजले चार, आईएनआई सिनेमाजले ८, बिएसआर मुभिजले ५, एफक्युबले ५ शो दिएको छ ।

फिल्ममा मदनकृष्ण श्रेष्ठ, हरिवंश आचार्य, रविन्द्रसिंह बानियाँ, राजाराम पौडेल, गौरी मल्ल, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौड्याल, प्रेम पाण्डे, सुमन रिमाल, माधव अधिकारी, प्रकाश भट्टराई, घनश्याम जोशी, अर्जुन आचार्य, पण्डित प्रज्वल लुइँटेल लगायतको अभिनय रहेको छ । यहिँ फिल्म मार्फत अरुण क्षेत्री र अन्जना बराइलीले डेब्यु गर्दैछन् ।