दयाहाङलाई ‘के घर के डेरा’बाट हिटको ह्याट्रिक गर्ने अवसर

यो बर्ष नेपाली फिल्ममा सबैभन्दा बढी लक नायक दयाहाङ राईलाई लागिरहेको छ । उनी अभिनित ‘कबड्डी ४’ले ऐतिहासिक रेकर्ड राख्दै बम्पर व्यापार गर्यो । उनै, दयाले समेत नपत्याएको फिल्म ‘२ नम्बरी’ले पनि बक्स अफिसमा सफलता कायम गर्यो । यसैले, अब उनका लागि यो बर्ष सफलताको ह्याट्रिक गर्ने अवसर आएको छ ।

फिल्म ‘राधा’मा दयाको केमियो भएकाले यसतर्फ नलागौं । दया अभिनित ‘के घर के डेरा’ भोली शुक्रबारदेखि नेपालभर रिलिज हुँदैछ । यो फिल्मको बुकिङ पनि अधिकांश मल्टिप्लेक्समा खुलिसकेको छ । मल्टिप्लेक्समा फिल्मले राम्रो शोज पाएको छ ।

यो फिल्मले पनि हिटको व्यापार गरेको खण्डमा दयाले हिटको ह्याट्रिक गर्नेछन् । यसैबर्ष, उनी अभिनित अर्को फिल्म ‘फूलबारी’ पनि रिलिज हुँदैछ । यसअर्थ, दयालाई यो बर्ष हिटको शत प्रतिशत रेसियो बनाउँदै नम्बर १ पोजिसनमा फर्किने ठूलो अवसर छ ।

दीपेन्द्र के खनालको निर्देशनमा तयार भएको यो फिल्ममा दयाको अलवा विपिन कार्की, वर्षा राउत, सुरक्षा पन्त मुख्य भूमिकामा छन् । कमेडी जनरामा निर्माण भएको फिल्मले तिहारमा सुखद कमाई गर्ने अपेक्षा गरिएको छ ।