फिल्म ‘मीलन’ ट्रेलर: प्रेममा आउने विभिन्न उतार-चढाव

त्रिकोणात्मक प्रेमकथामा आधारित फिल्म ‘मीलन’को ट्रेलर सार्वजनिक भएको छ । कार्तिकको १८ गतेबाट प्रदर्शन हुन लागेको यो फिल्म ट्रेलरमा मुख्य तिन कलाकारको प्रेम, विछोड, मित्रताको कथा भनिएको छ ।

टेक पौरखी राईको लेखन तथा निर्देशनमा तयार भएको मित्रताबीचमा प्रेमको कारण आउने दरारको कथा भन्ने फिल्ममा मुख्य कलाकारहरु सलोन बस्नेत र दुई नयाँ कलाकार कुशल शाह र शिल्पा थापाको प्रेम र विछोड हेर्न सकिन्छ । फिल्ममा शिशिर वाङ्देल, विशाल पहाडी र सुमिन गुरुङको पनि अभिनय छ । यो फिल्मबाट कुशल र शिल्पाले अभिनयमा डेब्यू गरेका हुन् ।

यो फिल्मको कथावस्तु निक्कै राम्रो भएकाले आफूले काम गरेको फिल्मका मुख्य कलाकार सलोनले बताए । उनले, फिल्ममा आफू र शिशिरबाहेक अरु कलाकार नयाँ भएपनि उत्कृष्ट फिल्म बनेको बताए । केही समय अगाडि भएको विशेष शोमा उत्कृष्ट प्रतिक्रिया पाएको भन्दै सलोनले फिल्म चल्नेमा विश्वास व्यक्त गरे ।

यस्तै, कार्यक्रममा अतिथीको रुपमा पुगेका निर्देशक शोभित बस्नेतले पनि फिल्म हेरिसकेको भन्दै राम्रो बनेको प्रतिक्रिया दिए । काठमाडौं र कालिन्चोकमा छायांकन गरिएको फिल्ममा राहुल राईको छायांकन, तारा किम्बे  थापाको सम्पादन छ ।

फिल्ममा टंक बहादुर राईको भिएफएक्स, राजु सेन्चुरीको संगीत, कविराज गहतराजको कोरियोग्राफी, कुमार महर्जनको द्वन्द्व निर्देशन, शैलेश श्रेष्ठकको ब्याकग्राउन्ड स्कोर छ । फिल्मलाई प्रविण थापाले निर्माण गरेका हुन् ।