बिहिबारदेखि ‘नाई नभन्नु ल ६’को छायांकन, नयाँ बर्षमा रिलिजको तयारी

हिट सिरिज ‘नाई नभन्नु ल’को छैटौं श्रृङ्खलाको छायांकन बिहिबारदेखि सुरु हुने भएको छ । निर्देशक तथा निर्माता विकासराज आचार्यले फिल्मको छायांकन बिहिबारदेखि सुरु गर्ने तयारी गरेका छन् । तिहारअघि ३ दिन छायांकन भएपछि बाँकी छायांकन तिहारपछि हुनेछ ।

लेखक सामिप्यराज तिमिल्सिनाका अनुसार, फिल्ममा यसबाट नायिका आँचल शर्मा केन्द्रिय भूमिकामा छिन् । उनको साथमा नव–नायक आर्शिवाद क्षेत्रीले काम गर्नेछन् । फिल्ममा अन्य केही कलाकार भएपनि आँचल र आर्शिवादकै वरिपरी यो फिल्म घुम्नेछ ।

फिल्ममा पुरुषोत्तम प्रधानको छायांकन, बसन्त सापकोटाको संगीत छ । यसैविच, यो फिल्मलाई नयाँ बर्षमा रिलिज गर्ने योजना विकासको छ । ‘नाई नभन्नु ल’का केही श्रृङ्खला यसअघि पनि नयाँ बर्षमा रिलिज भएर राम्रो व्यापार गर्न सफल भएका थिए ।

फिल्ममा नायक अनुभव रेग्मीले केमियो भूमिकामा काम गर्नेछन् । यसअघिका पाँचैवटा सिरिजमा उनी मुख्य भूमिकामा थिए ।