दयाहाङ भन्छन्–‘हामीलाई कमजोर फिल्म खेल्ने छुट छैन’

नायक दयाहाङ राईको आउँदो साता रिलिज हुन लागेको फिल्म ‘के घर के डेरा’ले बक्स अफिसमा राम्रो कमाई गर्यो भने, यो बर्षको सर्वाधिक सफल नायकको सूचीमा उनी पहिलो स्थानमा रहने पक्का छ । किनकी, अहिलेसम्मकै सर्वाधिक धेरै कमाई गर्ने फिल्म ‘कबड्डी ४’को मुख्य कलाकार उनी नै हुन् । उनले, बनाएको यो रेकर्ड तोड्न अब अन्य फिल्मलाई त्यती सहज छैन ।

त्यसमाथि, असोजको २१ गतेबाट रिलिज भएको फिल्म ‘२ नम्बरी’ले बक्स अफिसमा बम्पर व्यापार गरिरहेको छ । दुई फिल्म ६ महिनाकै अन्तरमा सुपरहिट दिइसकेका दया आउँदो साता रिलिज हुने ‘के घर के डेरा’बाट पनि आशावादी छन् । उनै दया दर्शकले दिएको मायाका कारण अब आफूहरुलाई कमजोर फिल्म खेल्ने छुट नभएको बताउँछन् ।

दया भन्छन्–‘हामीले यो बिचमा कतिपय निक्कै कमजोर फिल्महरुमा पनि काम गर्यौं । ती फिल्महरुले बक्स अफिसमा कमजोर नतिजा देखाएका थिए । तर, अब यो बिषयमा म सधै सजग हुनेछु ।’

दयाको लाइनअप पनि बलियो छ । उनले फिल्म ‘फूलबारी’को काम पनि सकाएका छन् । नेपाली फिल्म क्षेत्रमा ‘लुट’ फिल्ममा काम गरेपछि एकाएक उदाएकी दयालाई कामको अभाव कहिले भएन । सधै नै निक्कै साधारण शैलीमा हिड्ने, स्टारडमको घमण्ड कहिले नगर्ने भएकाले पनि दयालाई दर्शकले साथ दिएका छन् । दया अब राम्रो कथामा सधै नै सजग भएर काम गर्ने बताउँछन् ।