‘हिजो आजका कुरा’को प्रिमियरमा को–को पुगे ?

सन्तोष पन्तले निर्माण गरेको फिल्म ‘हिजो आजका कुरा’को प्रिमियर काठमाडौंको आई प्लेक्स मलमा अवस्थित वान सिनेमाज्मा गरिएको छ । फिल्मका मुख्य कलाकारसहित फिल्मको प्रिमियरमा दीपकराज गिरी, दीपाश्री निरौला, जितु नेपाल लगायतका कलाकार पुगेका थिए ।

फिल्म हेरेका अधिकांशले यसको बिषयवस्तु मन पराएका छन् । विशेषगरि, फिल्ममा अमेरिका, अष्ट्रेलिया जानुपर्ने वाध्यता, नेपालमा रहेका परिवारमा हुने पीडाको कथालाई देखाइएको छ ।

फिल्मका मुख्य कलाकार सन्तोष पन्त, रमा थपलिया, ऋचा शर्मा, दिव्य देव, केकी अधिकारी, जेविका कार्की लगायत हलमा पुगेका थिए ।

प्रिमियरमा पुग्ने अधिकांशले निर्देशक साकार पन्तको डेब्यू कामको प्रशंसा गरे । फिल्मको पहिलो हाफलाई साकारले पुरानो सिरियल ‘हिजो आजका कुरा’को शैलीमा प्रस्तुत गरेका छन् । फिल्मको पहिलो हाफ हेर्दा सिरियल हेरेको आभाष हुन्छ । दोश्रो हाफमा भने फिल्मको कथावस्तु, प्रस्तुति सुधारिएको छ ।

दिव्य देव र ऋचा शर्माको पाटोले दर्शकलाई होल्ड गर्छ । साकार र रीमा विश्वकर्मा विचको पारिवारिक समस्याले पनि दर्शकको मन छुन्छ । फिल्मले विदेशमा पनि गाह्रो रहेको भन्दै नेपालमा नै बस्नुपर्ने सन्देश दिएको छ । फिल्मको समीक्षा हामी शुक्रबार गर्नेछौं ।