‘म राजेश हमाल’को पोस्टर संगै प्रदर्शन मिति सार्वजनिक

नेपाली फिल्म ‘म राजेश हमाल’ आगामी चैत्र १० गते प्रदर्शन हुने भएको छ ।

केहि समय अघि नै सम्पूर्ण काम सकेर प्रदर्शनको पर्खाइमा रहेको फिल्म ‘म राजेश हमाल’को फर्स्टलुक पोस्टर संगै प्रदर्शन मिति सार्वजनिक गरिएको हो। पोस्टरले फिल्मको कथावस्तुको थिम झल्काएको छ । नेपाली फिल्मका सुपरस्टार राजेश हमाल बन्न चाहने मुख्य चरित्रको सपना वरपर फिल्म घुमेको छ । पोस्टरमा गुडिरहेको ट्रकको पछाडि एक किशोरी कुदिरहेको देख्न सकिन्छ ।

राजेश हमाल बन्ने सपना पालेकी ती किशोरीको चाहना पोस्टरमा छ । स्केच डिजाइनमा तयार पारिएको पोस्टरमा लेखिएको छ, ‘राजेश हमाल सुपरस्टार मात्र हैनन बरु एक भावना हुन् ।’

जोन योञ्जनको निर्देशन रहेको फिल्ममा सञ्चिता लुँइटेल, मुकुन भुसाल, महेश त्रिपाठी, एभोन राज उप्रेती, संजोग रसाइली र अस्मिता लामिछानेको मुख्य भूमिका छ । आर्यन सिग्देल विशेष भूमिकामा देखिने छन् भने राजेश हमालको आवाजले कथा बोकेको छ ।

कथाकार जोन योञ्जन हुन भने पटकथा सायदले लेखेका हुन् । आलोक शुक्लाको छायांकन, भीम विश्वकर्माको सम्पादन, मणिरत्न त्रिपाठीको साउण्ड डिजाइन रहेको फिल्मको स्क्रिप्ट डक्टर भने केशव पाण्डे हुन ।

किरण कुमार महर्जन सह-निर्माता रहेको फिल्ममा जिवलाल भुसाल, नविन भुसाल र श्रृषा भुसाल भने कार्यकारी निर्माता हुन् । बड पिक्चर, जोय पपया, ट्राइडेन्ट कन्सेप्ट र फोपिको ब्यानरमा बनेको फिल्म फिल्कर आर्ट्सले निर्माण गरेको हो ।