‘परदेशी २’सँग साम्राज्ञीको ‘लण्डन टु पेरिस’ भिड्ने पक्का

फागुणको ५ गते नेपाली फिल्म ‘लण्डन टु पेरिस’ रिलिज हुने भएको छ । आज यसको निर्माणपक्षले प्रदर्शन मिति घोषणा गरेको हो । एबी इन्टरनेशनल प्रोडक्शनले घनश्याम लामिछानेको निर्देशनमा तयार भएको फिल्मलाई फागुण ५ मा ल्याउने पक्का गरेको हो । योसँगै यही मितिमा रिलिज हुन लागेको अर्को फिल्म ‘परदेशी २’सँग यो फिल्मको भिडन्त पक्का भएको छ ।

यो फिल्ममा साम्राज्ञी राज्यलक्ष्मी शाह, गरिमा शर्मा, कविर खड्का र निश्चल खड्काको मुख्य भूमिका छ । लण्डनदेखि पेरिससम्मको यात्राका क्रममा हुने प्रेमलाई फिल्मले प्रस्तुत गरेको छ । प्रदीप भारद्धाजले फिल्मको कथा लेखेका हुन् ।

बेलायत र फ्रान्समा छायांकन गरिएको फिल्मको व्यापारले नायिका शाहको खस्कदो फिल्मी करिअरलाई कसरी अगाडि बढ्न मद्दत गर्छ, त्यो भने हेर्न बाँकी छ ।