रमाइलो छ ‘के घर के डेरा’को टिजर

कार्तिकको ४ गतेबाट रिलिज हुन लागेको फिल्म ‘के घर के डेरा’को टिजर सार्वजनिक भएको छ । टिजरमा फिल्मका मुख्य कलाकारहरु घर र डेराको लुकामारी खेलिरहेको देख्न सकिन्छ । फिल्ममा नायक दयाहाङ राई, विपिन कार्की, वर्षा राउत, सुरक्षा पन्त मुख्य भूमिकामा छन् । दया र सुरक्षा, वर्षा र विपिनको जोडी फिल्ममा देख्न सकिन्छ । उनीहरुको सपना काठमाडौंमा घर किन्ने छ । तर, डेरामा बसेका उनीहरु यही खेलमा दौडिरहेको टिजरमा देख्न सकिन्छ ।

फिल्ममा रविन्द्र झा, आशान्त शर्मा, लक्ष्मी गिरी, प्रभावकर न्यौपाने, सरोज अर्याल, भोलाराज सापकोटा, घनश्याम जोशी, कोशिश क्षेत्री र आयुषी ढकालको पनि अभिनय हेर्न सकिन्छ ।

सिंगे लामाको कथा रहेको फिल्ममा महेश दवाडीको पटकथा तथा संवाद छ । फिल्मलाई दीपेन्द्र के खनालले निर्देशन गरेका हुन् । यसअघि ‘चिसो मान्छे’ जस्तो सामाजिक मुद्दा उठाएका उनले यसपटक यो फिल्ममा भने कमेडीलाई भरपुर प्रयोग गरेका छन् ।

शरद श्रेष्ठ, राजीव श्रेष्ठ र किरण महर्जनको लगानीमा बनेको यो फिल्ममा यूवराज कार्की कार्यकारी निर्माताको रुपमा छन् । दिर्घ गुरुङको छायांकन रहेको फिल्ममा दिर्घ खड्का सम्पादकको रुपमा छन् । फिल्ममा शंकर थापा, कोशिश क्षेत्रीको संगति छ ।