४० बालबालिकालाई सुहानाले हेराइन् ‘ऐना झ्यालको पुतली’

सुजित बिडारीको निर्देशनमा तयार भएको फिल्म ‘ऐना झ्यालको पुतली’ हेर्न आज नायिका सुहाना थापा बीग मुभिज पुगेकी छिन् । बीग मुभिजमा ४० अनाथ बालबालिकालाई लिएर पुगेकी सुहानाले फिल्म उत्कृष्ट बनेको प्रतिक्रिया दिइन् ।

बुढालिनकण्ठमा रहेको ‘माउन्टेन चिल्ड्रेन होम’मा रहेका अनाथ बालबालिकालाई सुहानाले फिल्म देखाउन केही दिन अगाडिदेखि नै प्रयास गरेकी थिइन् । तर, आज राष्ट्रिय बाल दिवस भएकाले पनि सुहानालाई फिल्म देखाउन सजिलो भयो ।

सुहानाले यो आश्रममा सहयोग पनि गर्दै आएकी छिन् । सुहाना अभिनित फिल्म ‘ए मेरो हजुर ४’ पनि हेरेको बालबालिकाहरुले बताए । सुहानाको मनकारी मनको उनीहरुले प्रशंसा गरेका थिए ।

सुहानाले फिल्मले देखाएको कथाले मन छोएको बताइन् । आफूले फिल्ममा देखाए जस्तो बालापन नबिताएको भन्दै उनले शहरमा बस्ने यूवायूवतीले यो फिल्म अनिवार्य हेर्नुपर्ने तर्क गरिन् ।