‘प्रकाश’ले पुरा गर्न नसकेको प्रदीपको लक्ष्य

फिल्म ‘प्रकाश’लाई लिएर नायक प्रदीप खड्का निक्कै नै आशावादी थिए । उनको फिल्म ४ बर्षपछि हलमा लागेको थियो । यसैले, पनि यो फिल्मले उनको करिअरलाई नै नयाँ ढंगले अगाडि बढाउन आवश्यक थियो । भदौ १० गतेबाट रिलिज भएको यो फिल्म आज पनि केही हलमा रिलिज भैरहेको छ ।

तर, फिल्मले औषत मात्र व्यापार गर्यो । फिल्मको चर्चा यसको रिलिजपछि जसरी भयो, त्यो अनुसार व्यापार भने हुन सकेन ।

फिल्म चल्नु अगाडि नायक प्रदीप खड्काको एउटा दाबी के थियो भने, यो फिल्मले उनका अघिल्ला रिलिज फिल्मको भन्दा बढी व्यापार गर्नेछ । उनको दाबी अनुसार फिल्मले ५ करोड भन्दा बढीको ग्रस कलेक्शन गर्नुपर्ने थियो ।

तर, फिल्मले तेश्रो सातासम्म आइपुग्दा डेढ करोड हारहारीको ग्रस कलेक्शन गरेको छ । प्रदीपले ठोकुवाका साथ आफ्ना अघिल्ला फिल्मको भन्दा बढी व्यापार यो फिल्मले गर्ने दाबी गरेपनि त्यो लक्ष पुरा हुन सकेन ।

बरु, फिल्म चलेपछि आक्रोशित हुँदै शो नपाएको भन्दै प्रदीपले फिल्मीकर्मीदेखि प्रदर्शकमाथि तितो पोखे । प्रदीप यसपछि फिल्म ‘प्रेमगीत ३’को प्रचारका लागि भारतमा छन् । उनले यो फिल्मले अहिलेसम्म नेपाली फिल्मले बनाएका सबै रेकर्ड तोड्ने दाबी गरेका छन् । ‘प्रकाश’बाट पुरा नभएको उनको लक्ष ‘प्रेमगीत ३’बाट पुरा हुन्छ या हुँदैन, हेर्न बाँकी छ ।