हिन्दी र नेपाली दुबै भाषामा असोज ७ गते नै रिलिज हुँदै ‘प्रेमगीत ३’

नेपाली र हिन्दी भाषामा तयार भएको फिल्म ‘प्रेमगीत ३’लाई यसको निर्माणपक्षले असोज ७ गते एकसाथ रिलिज गर्ने भएको छ ।यसअघि नेपालमा यो फिल्म असोज ७ मा नेपाली र असोज १४ मा हिन्दी भाषामा रिलिज गर्ने बताइएको थियो ।

तर, दर्शकको अत्याधिक मागका कारण दुबै भाषामा एउटै मितिमा प्रदर्शन तय भएको निर्माता तथा सन्तोष सेनले बताएका छन् । उनले, विशेषगरि मधेस क्षेत्रका दर्शकको मागलाई ध्यानमा राखेर एउटै मितिमा फिल्म रिलिज गर्न लागिएको उल्लेख गरेका छन् ।

यो फिल्मको अहिले भारतका विभिन्न स्थानमा प्रचार भैरहेको छ । नेपालमा पनि फिल्मको अर्को टिमले प्रचार गरिरहेको छ । फिल्ममा प्रदीप खड्का, कृष्टिना गुरुङ, शिव श्रेष्ठ, सुनिल थापा, मनिष राउत, प्रेम पुरी लगायतका कलाकारको अभिनय छ ।

फिल्मकोक आक्रामक प्रचारले दर्शकले यसको प्रतिक्षा ब्यग्रताका साथ गरिरहेका छन् । नेपालमा यो फिल्मको नेपाली भन्दा बढी हिन्दी भाषाको प्रतिक्षा छ । यसैले, नेपालमा पनि यो फिल्मले हिन्दी भाषामा नै बढी व्यापार गर्ने आँकलन गरिएको छ ।