जसितासँगको प्रेमबारे के भन्छन् धिरज ?

फिल्म चल्ने बेलामा कलाकारको प्रेम चर्चा चल्नु त नौलो कुरा नै भएन । कलाकारहरु प्रेममा रहेको खबरले मिडियामा चर्चा पाउँदा फिल्मलाई पनि फाइदा हुन्छ भन्ने वुझाई धेरैको छ ।

नायक पुष्प खड्का र नायिका श्रद्धा क्षेत्रीको प्रेम चर्चा फिल्म ‘कृष्णलीला’ चल्दा खुबै भयो । तर, यो चर्चाले फिल्मलाई फाइदा गरेन । बरु, फिल्म चल्दा चलेको प्रेम चर्चा फिल्म रिलिज भएपछि सुनसान हुने गरेको छ ।

नायक धिरज मगर र नायिका जसिता गुरुङको प्रेम चर्चा पनि नेपाली फिल्म बजारमा खुबै चलेको छ । फिल्म ‘आई एम ट्वान्टी वान’मा एकसाथ काम गरेका यी दुई प्रेममा रहेको खबर सार्वजनिक भएको धेरै भयो । हुनत, जसिताको नाम नायक प्रदीप खड्कासँग पनि नचलेको होइन ।

तर, नायक धिरज मगर यो कुरा स्विकार गर्दैनन् । उनले, यी सबै कुराहरु फिल्म चल्दा चल्ने बताए । उनले भने–‘इन्टु मिन्टु लण्डनमा’ चल्दा साम्राज्ञीसँग नाम जोडिएको थियो । त्यसपछि जसितासँग नाम जोडिएको थियो । फेरि अहिले बाबरी चल्ने बेलामा अदितीसँग नाम जोडिएको छ । यसैले, यी सबै गसिप मात्र हुन् ।’

धिरजको नाम अन्य नायिकासँग जोडिएपनि जसितासँग भने पक्का हो भन्ने गरिन्छ । तर, धिरज भने यी सबै कुरा हल्ला मात्र भएको बताउँछन् । फिल्म ‘बाबरी’ असोजको १४ गतेबाट रिलिज हुँदैछ ।