आलिया भट्टः बक्स अफिसकी रानी

नायिका आलिया भट्टलाई बक्स अफिसकी क्विन भन्दा फरक नपर्ला । यो बर्ष आलियाका ३ फिल्म रिलिज भए । तिनै फिल्मले दर्शकको मन मात्र जितेनन्, बक्स अफिसमा पनि धमाका नै मच्चाए ।

आलियाको मुख्य भूमिका रहेको फिल्म ‘गांगुबाई काठियावाडी’ यो बर्ष रिलिज भयो । संजयलीला भन्सालीको निर्देशन रहेको यो फिल्मले बक्स अफिसमा सय करोड माथिको व्यापार गर्यो । आलिया नै शिर्ष भूमिकामा रहेको फिल्मबाट उनको तारिफ पनि भयो ।

यो बर्ष नै आलिया अभिनित अर्को फिल्म ‘डार्लिङ’ नेटफ्लिक्समा रिलिज भयो । यो फिल्मलाई आलियाले नै निर्माण गरेकी थिइन् । यसले पनि ओटीटीमा हंगामा नै मच्चायो । फिल्मको कथावस्तुलाई दर्शकले खुबै रुचाए । साथै, आलियाको अभिनयले पनि दर्शकको मन जित्यो ।

उनै, आलिया अभिनित अर्को फिल्म ‘ब्रम्हास्त्र’ शुक्रबारदेखि हलमा लागिरहेको छ । यो फिल्मले ३ दिनमै विश्व बजारबाट २५० करोडको ग्रस कलेक्शन गरेको छ । भारतमा मात्र यो फिल्मको व्यापार ३ दिनमा १२० करोड भन्दा माथि छ । हिन्दी भर्सनमा फिल्मले १०६ करोडको व्यापार गरेको छ ।

यसरी, बक्स अफिसमा निरन्तर सफल हुँदै गएकी आलियाले दर्शकको साथ पनि पाएकी छिन् । आलिया बक्स अफिसमा निरन्तर छाइरहेकी छिन् ।