के कार्तिक ४ मा रिलिज हुँदैछ ‘छक्का पन्जा ४’ ?

छायांकनमा रहेको फिल्म ‘छक्का पन्जा ४’ कुन मितिमा रिलिज हुन्छ भन्ने चासो सर्वत्र छ । नेपाली फिल्मको व्यापार विस्तारै लयमा फर्किदै गर्दा बक्स अफिसमा धमाका मच्चाउँछ भनेर अपेक्षा गरिएको यो फिल्मको प्रदर्शन मिति अहिलेसम्म सार्वजनिक भएको छैन ।

तर, यसको निर्माणपक्षले फिल्म प्रदर्शनका लागि कार्तिक ४ को मितिलाई हेरिरहेको छ । तिहार लक्षित यो मितिमा ल्याउने बिषयमा छलफल भएपनि फाइनल भने भएको छैन ।

किनकी, भदौबाट सुरु भएको छायांकन अझै सकिएको छैन । फिल्मको सबै काम कार्तिक ४ सम्म सकिन्छ या सकिदैन भन्ने अझै पक्का गर्न नसक्दा निर्माणपक्ष अन्यौलमा छ ।

यो फिल्म राजनीतिक बिषयमा केन्द्रित छ । यसैले, निर्वाचन अगावै फिल्म रिलिज गर्नुपर्ने दबाबमा निर्माता दीपकराज गिरी छन् । फेरि, मंसिर ४ गते निर्वाचन र सोही दिनबाट सुरु हुने एक महिना लामो विश्वकप फुटबलका कारण पनि दीपकलाई दबाब बढेको हो ।

यदि, कार्तिक ४ मा फिल्म रिलिज गर्न नसकेको अवस्थामा ‘छक्का पन्जा ४’लाई आउँदो दशैंमा पोष्टपोन्ड गरेर नयाँ फिल्मको काममा लाग्ने तयारी दीपक र उनको टिमको छ । यस्तो भएको खण्डमा नयाँ बर्षमा दीपककै टिमको नयाँ फिल्म रिलिज हुनेछ ।

तर, सकेसम्म कार्तिक ४ मै फिल्म ल्याउने गरि काम भैरहेको वुझिएको छ । हेमराज वीसी निर्देशित यो फिल्ममा दीपकराज गिरी, दीपाश्री निरौला, केदार घिमिरे, बेनिशा हमाल, मलिना जोशी लगायतका कलाकारको अभिनय छ ।