श्रृष्टी र सौगातको जोडी हिट, फिल्म फ्लप

यो महिना नायक सौगात मल्ल र नायिका श्रृष्टी श्रेष्ठका लागि निक्कै दौडधुपको महिना रहन पुग्यो । एक हप्ताको अन्तरमा २ वटा फिल्म रिलिज भएपछि यी दुइको व्यस्तता पनि खुबै बढेको हो । भदौको ३ गते ‘माइकल अधिकारी’ र भदौको १० गते ‘राधा’ रिलिज हुँदा दुबै कलाकार खुबै दौडिए ।

दुबै फिल्ममा गर्भवती बनेकी श्रृष्टीले फरक खालको अभिनय गरिन् । उनको अभिनयको प्रशंसा पनि भयो । तर, यी दुबै फिल्म बक्स अफिसमा नराम्रोसँग पिटिए । यो महिना रिलिज भएका दुबै फिल्म असफल हुँदा यो जोडीलाई घाटा भने लाग्यो ।

श्रृष्टी र सौगातको जोडी दर्शकमाझ हिट छ । तर, फिल्म भने उनीहरुले चलाउन सकेनन् । अझ, ‘राधा’लाई त सौगातले निर्माण गरेका थिए । यो जोडीले केही फिल्ममा एकसाथ अभिनय गरेपनि बक्स अफिसमा उनीहरु सफल छैनन् । ‘राधा’ फिल्मबाट श्रृष्टीको अभिनयको तारिफ भने खुबै भयो ।