ऐश्वर्याले रजनीकान्तको खुट्टा छोएपछि..

मणिरत्नमको ऐतिहासिक ड्रामा फिल्म पोन्नियिन सेल्भान–१ यतिबेला निकै चर्चामा छ । यो फिल्मको ट्रेलर हालै सार्वजनिक भएको छ । यस फिल्मको ट्रेलर सार्वजनिक कार्यक्रममा साउथ इन्डस्ट्रीका धेरै सेलिब्रेटीहरु सहभागी भएका थिए ।

यस अवसरमा बलिउड अभिनेत्री ऐश्वर्याले पहिले फिल्मका निर्देशक मणिरत्नमलाई अँगालो हालिन् र त्यसपछि सुपरस्टार रजनीकान्तलाई भेटिन् । ट्रेलर सार्वजनिक कार्यक्रमसँग सम्बन्धित केही तस्विर र भिडियो सामाजिक सञ्जालमा भाइरल भइरहेका छन् । सुरुमा ऐश्वर्याले दौडिएर निर्देशक मणिरत्नमलाई अँगालो हालेकी थिइन्, त्यसपछि ऐश्वर्याले रजनीकान्तलाई भेटिन् उनले रजनीकान्तको खुट्टा छोइन्, जसको भिडियो सार्वजनिक भएको छ । बच्चन बुहारीको यो कार्यले सबै चकित भएका छन् भने, सामाजिक सञ्जालमा उनको निकै तारिफ भइरहेको छ ।

यो फिल्म १०औं शताब्दीमा चोल साम्राज्यको संघर्षको कथामा आधारित छ । यस फिल्ममा ऐश्वर्या राय महत्वपूर्ण भूमिकामा छिन् । ऐश्वर्याले रजनीकान्तसँग फिल्म एन्थिरनमा सँगै काम गरेकी थिइन् । यति लामो समयपछि रजनीकान्तसँग भेट्न पाउँदा ऐश्वर्या निकै खुसी देखिएकी छिन् ।

फिल्ममा उनी दोहोरो भूमिकामा छन् । ऐश्वर्याले दोहोरो भूमिका निर्वाह गरेको यो पहिलो पटक हो । फिल्ममा उनको भूमिका आमा छोरीको छ । यो ५०० करोडको फिल्ममा ऐश्वर्यासँगै साउथका धेरै सुपरस्टारहरु पनि देखिनेछन् । सार्वजनिक भएको ट्रेलर गजबको छ । यसमा युद्धको मैदानलाई सुन्दर रूपमा चित्रित गरिएको छ।

राजा राज चोझनको जीवनमा आधारित कल्की कृष्णमूर्तिको लोकप्रिय उपन्यासलाई यस फिल्मले पर्दामा उतारेको हो । यसको पटकथा मणिरत्नम, जयमोहन र कुमारावेलले लेखेका हुन् । फिल्मलाई मणिरत्नमले निर्देशन गरेका हुन् । दुईवटा फिल्ममध्ये पहिलो फिल्म सेप्टेम्बर महिनामा आउन लागेको हो ।

फिल्ममा विक्रम, ऐश्वर्या राय बच्चन, तृषा, जयम रवि र कार्ती प्रमुख भूमिकामा छन् । फिल्म हिन्दीका साथै कन्नड, मलयालम  र तमिल भाषामा पनि रिलिज हुनेछ ।  फिल्म ३० सेप्टेम्बरमा रिलिज हुँदैछ ।