‘सम्हालिन्छ कहिले मन’ पाँचौ दिनमा हाउसफूल, हलमा पूजा र आकाश

भदौको १७ गतेबाट रिलिज भएको फिल्म ‘सम्हालिन्छ कहिले मन’को व्यापार अन्य हलमा भन्दा एफक्यूब हलमा राम्रो छ । यो हलमा फिल्मको अकुपेन्सी हेरक दिन ५० देखि ८० प्रतिशतसम्म छ । आज नायिका पूजा शर्मा र नायक सोनम तोप्देन हलमा पुगे । पाँचौ दिनमा पनि दर्शकले दिएको उल्लेखनीय प्रेमले उनीहरु खुशी देखिएका थिए ।

यो फिल्मको प्रस्तुति, गीतसंगीत, क्लाइमेक्सलाई दर्शकले रुचाएका छन् । फिल्म हेर्न हल पुगेका अधिकांश दर्शकले यसको हरेक कुरा मन परेको बताए ।

नायिका पूजा शर्माले फिल्म हेरेर दर्शक माया दिइरहेको भन्दै खुशी व्यक्त गरिन् । उनले, हलमा कलाकार पुगेर हल्ला गरे मात्र चलेको भन्ने भ्रम फैलाउन नहुने तर्क गरिन् । उनले भनिन्–‘दर्शकले फिल्म चलेको दिनदेखि नै माया दिइरहनुभएको छ । तर, हलमा पुगेर भीड देखाउँदा मात्र चलेको भन्ने सोचले केही समस्या निम्त्याएको हो ।’

सुदर्शन थापाको निर्देशन तथा एबी प्रोडक्शनको ब्यानरमा निर्माण भएको यो फिल्ममा पूजा, सोनम र आकाश श्रेष्ठको मुख्य भूमिका छ । फिल्मले एफक्यूबका हरेक शोमा उल्लेखनीय दर्शक बटुलेको हलका म्यानेजरले बताएका छन् ।