‘हिजो आजका कुरा’ को ‘परदेश’ गीत सार्वजनिक

बरिष्ठ अभिनेता सन्तोष पन्तले निर्माण गरेको फिल्म ‘हिजो आजका कुरा’ मा समाबेश ‘परदेश’ बोलको गीत शुक्रबार सार्वजनिक गरिएको छ । असोज २८ गतेदेखि प्रदर्शन हुने फिल्मको निर्देशन साकार पन्तले गरेका हुन् ।

फिल्मको पहिलो गीत ‘ए जदौ माया जदौं’ अत्यन्तै हिट भएको थियो । सो गीत युट्युवमा अहिलेसम्म २ करोड ५८ लाख बढी पटक हेरिसकिएको छ । कोरोना महामारीका कारण पूर्वघोषित ०७७ वैशाख १२ मा प्रदर्शन स्थगित गरिएको फिल्म अब भने दशै तिहारको बीचमा दर्शकमाझ ल्याउन लागिएको हो ।

सार्वजनीक दोश्रो गीतको शब्द एक्तारे र साकार पन्तले लेखेका हुन् भने स्वर र संगीत हर्कुलस बस्नेतको छ । बिरही भावको गीतको भिडियोमा सन्तोष पन्त, रमा थपलीया, साकार पन्त, ऋचा शर्मा, रिमा बिश्वकर्मा, केकी अधिकारी, लक्ष्मी भुसाल, रबि डंगोल, मन्जु श्रेष्ठ, दिब्य देवलगायतका कलाकारहरु समेटिएका छन् ।

पन्त फिल्म प्रोडक्सनको ब्यानरमा निर्मित फिल्मको कथा बरिष्ठ अभिनेता पन्तको हो भने पटकथा सन्दिप किस्नाको छ । रवि सायमीले खिचेको फिल्मको कार्यकारी निर्माता प्रतिभा पन्त,सह–निर्माता बैकुष्ठप्रसाद उपाध्याय (अशोक) र सचितकुमार मिश्र छन् ।

फिल्ममा सन्तोष पन्त, साकार पन्त, रमा थपलिया, केकी अधिकारी, ऋचा शर्मा, दिब्यदेव, रिमा बिश्वकर्मा, स्व.जयनन्द लामा, लक्ष्मी भुसाल, जेविका कार्की, रमेश अधिकारी, मञ्जु श्रेष्ठ, बिनय कुँइकेल, अनुष्का अधिकारी, निराजनप्रसाद अर्याल, सबिन शाक्य, कमला रेग्मी, रिहान केसीलगायतले अभिनय गरेका छन ।

डेढ दशक बढी नेपाल टेलिभिजनमा निरन्तर प्रशारण भइ दर्शकको मनमा बस्न सफल टेलिश्रृंखला ‘हिजो आजका कुरा’ कै टिमले निर्माण गरेको ‘हिजो आजका कुरा–द मुभी’ लाई यो बर्षकै प्रतिक्षित फिल्मको रुपमा हेरिएको छ ।