झिँगे दाउ’बाट पाएको प्रतिक्रियाले उत्साहित आँचल

नायिका आँचल शर्माका लागि शुक्रबारदेखि रिलिजमा आएको फिल्म ‘झिँगे दाउ’ विशेष छ । किनकी, यो फिल्म चलेको खण्डमा र उनको कामको तारिफ भएको खण्डमा आगामी दिनमा उनको फिल्मी यात्रा सजिलो हुनेछ ।

आँचलले यो फिल्म आफ्नो लागि नयाँ जन्म भनेकी छिन् । यसर्थ पनि आँचल फिल्मको प्रचारदेखि रिलिजपश्चात पनि खुबै दौडधुप गरिरहेकी छिन् । शुक्रबार काठमाडौंका विभिन्न हलमा पुग्दा यी नायिका उत्साहित देखिइन् । दर्शकले फिल्म हेरेर दिएको प्रतिक्रियाले आफू उत्साहित भएको र फिल्मले पनि राम्रो सुरुवात गरेको उनको भनाई थियो ।

ज्ञानेन्द्र देउजा निर्देशित यो फिल्ममा केकी अधिकारी, मुकुन भुषाल, कुशल बिष्ट लगायतको पनि अभिनय छ । आँचलको अभिनयलाई भने अधिकांशले सरप्राइज भनेका छन् । यसैले, पनि आँचल प्रतिक्रियाले उत्साहित भएकी हुन् ।

भीडभाडको फिल्ममा रमाउँदै आएकी आँचल यसपटक यो फिल्म चल्दा आगामी २ प्रोजेक्ट ‘बर एन्ड बधु र नाई नभन्नु ल ६’लाई फाइदा हुनेमा विश्वस्त छिन् ।