सोनम तोप्देनः अबको ‘सितारा’

फिल्म ‘सम्हालिन्छ कहिले मन’ शुक्रबारदेखि रिलिज भएको छ । शुक्रबार बिहानैबाट दर्शकको राम्रो उपस्थितीमा फिल्मले माया पाइरहेको छ । यो फिल्म सार्वजनिक भएसँगै नयाँ नायक सोनम तोप्देनको चर्चा पनि खुबै चलिरहेको छ । मिडियाकर्मीदेखि दर्शकले सामाजिक संजालमा फिल्ममा सोनमको काम र उनको लुक्सलाई लिएर खुबै प्रशंसा पनि गरिरहेका छन् । सोनमले नै फिल्म बोकेको चर्चा पनि भैरहेको छ ।

शुक्रबार बेलुकी आयोजना भएको फिल्मको बिशेष शोमा पनि सोनमको कामको तारिफ भयो । फिल्म हेर्न हलमा पुगेकी गायिका आनी छोइङ डोल्माले त सोनमलाई अबको ‘सितारा’ नै भनिन् । यस्तै, चलचित्र विकास बोर्डका अध्यक्ष तथा निर्देशक भुवन केसीले पनि नेपाली फिल्मले नयाँ स्टार पाएको प्रतिक्रिया दिए ।

यो फिल्मबाट सोनमको कामको चौतर्फी प्रशंसा भैरहेको छ । फिल्मलाई लिड गरेका सोनमले दर्शकलाई रुवाउँछन् पनि । उनले आफूलाई हरेक प्रकारले फिल्ममा उत्कृष्ट देखाउन कुनै कसर बाँकी राखेका छैनन् । सोनमले प्रतिक्रिया दिदै भने–‘यदि, दर्शकले माया गर्नुभयो भने रोमन फेरि आउनेछ ।’

सुदर्शन थापासँग काम गरेका अधिकांश कलाकार स्टार बनेका छन् । आर्यन सिग्देल, प्रदीप खड्का, पूजा शर्मा, पल शाह, आकाश श्रेष्ठको स्टारडम फिल्म क्षेत्रमा चम्कियो । सोनम तोप्देन अब सोही बाटोमा रहेको विश्लेषण धेरैको छ ।
यो फिल्ममा काम गरेपछि ४ बर्षसम्म मौन बसेका सोनमले अन्ततः दर्शकको मन जितेका छन् । सोनम अब फिल्म क्षेत्रको ‘सितारा’को रुपमा उदाउनेमा दुई मत छैन ।