‘प्रेमगीत ३’को ट्रेलरः राजयोग र प्रेमयोगको दोसाधमा प्रदीप

नायक प्रदीप खड्का र नायिका कृष्टिना गुरुङको मुख्य भूमिका रहेको फिल्म ‘प्रेमगीत ३’को ट्रेलर सार्वजनिक गरिएको छ । हिन्दी र नेपाली भाषामा सार्वजनिक गरिएको ट्रेलरमा यसअघि सार्वजनिक भएका २ टिजरका अधिकांश दृश्य समावेश छन् ।

फिल्मको ट्रेलर कथा खुलाउने प्रयास गरेको छ । विशेषगरि, एउटै राजाका २ छोरामध्ये एक असल र एक खराब भएको फिल्ममा देखाइएको छ । शिव श्रेष्ठ राजाको भूमिकामा छन् । दुई छोराको भूमिकामा प्रदीप खड्का र मनिष राउत देखिएका छन् । फिल्ममा सुनिल थापा, प्रेम पुरी लगायतको पनि अभिनय छ ।

प्रेमलाई राजयोग र प्रेमयोग मध्ये एक रोज्नुपर्ने अवस्था आएको पनि ट्रेलरमा देखाइएको छ । अर्कोतिर, राजाको शासन गर्न चाहने मनिष राउतको दाउपेच पनि फिल्ममा देखाइएको छ । मुस्ताङको हिउँमा खिचिएको फिल्मलाई राजेश श्रेष्ठले छायांकन गरेका हुन् । फिल्ममा स्वर्गीय छेतन गुरुङ र सन्तोष सेनको निर्देशन छ ।