मित्रताको कथामा ‘सम्हालिन्छ कहिले मन’, हलमा दर्शक फर्किने पूजा, आकाश र सोनमको विश्वास

शिर्ष गीत सार्वजनिक भएसँगै नेपाली फिल्म ‘सम्हालिन्छ कहिले मन’लाई लिएर दर्शकको उत्सुकता बढेको छ । मित्रताको कथामा निर्माण भएको यो फिल्मको मेकिङ, गीतसंगीतले दर्शकको ध्यान खिचेको छ । विशेषगरि, लण्डन, दुबई र मुस्ताङका दृश्यमा फिल्मका मुख्य कलाकारहरु पूजा शर्मा, आकाश श्रेष्ठ र सोनम तोप्देनको मित्रताको कथाले दर्शकलाई रोमाञ्चित बनाउने विश्वास मेकरको छ ।

यो फिल्मकी मुख्य नायिका पूजा शर्मा भन्छिन्–‘दर्शकले लभ स्टोरी फिल्मलाई जहिले पनि मन पराउनुभएको छ । यसपटक दर्शकले रमणीय दृश्यमा तिन जना साथीको कथा हेर्न पाउनुहुनेछ ।’

डेब्यू फिल्म भएका कारण पनि सोनम उत्साहित छन् । उनले भने–‘यति राम्रो कथा र टिमबाट फिल्ममा डेब्यू गर्ने चाहना हरेक कलाकारको हुन्छ । यसकारण पनि म भाग्यमानी हुँ भन्ने लाग्छ ।’

नायक आकाश श्रेष्ठले पनि फिल्मको कथावस्तु उत्कृष्ट भएको र सोही अनुसार दृश्य खिचिएको बताए ।

फिल्ममा पूजाको मित्रता र प्रेम आकाश र सोनम दुबैसँग देखाइएको छ । सुदर्शन थापा आफैमा लभ स्टोरी फिल्म निर्देशन गर्न माहिर मानिन्छन् । यसैले, पनि उनले दर्शकमा जितेको भरोसा, आकाश र पूजाको जोडी, सोनमको क्रेज आदिले पनि फिल्मप्रति दर्शकको उत्साह बढेको छ ।

यी तिनै जना कलाकारले लामो समयदेखि नेपाली फिल्म हलमा लागेको दर्शकको खडेरीलाई यो फिल्मले तोड्ने विश्वास गरेका छन् ।