हलमा दुई नेपाली फिल्मसँगै ‘लाइगर’ भिड्दै

आज शुक्रबार बाट दुई नेपाली फिल्म प्रदर्शनमा आएका छन् । दिनेश राउत निर्देशित ‘प्रकाश’ र सुवर्ण थापाको ‘राधा’ एकसाथ प्रदर्शनमा आएका हुन् ।

‘प्रकाश’मा शिक्षक बन्नका लागि एक व्यक्तिले कस्तो संघर्ष गर्नुपर्छ भन्ने कथा भनिएको छ । फिल्ममा प्रदीप खड्का, दीया मास्के, रेनु योगी, प्रकाश घिमिरे, राजन खतिवडालगायतको अभिनय रहेको छ ।

त्यस्तै अभिनेत्री सृष्टि श्रेष्ठ र सौगात मल्लको अभिनय रहेको फिल्म ‘राधा’मा आफ्नो श्रीमानको पर्खाइमा रहेकी एक पत्नीको कथा समेटिएको छ । फिल्ममा सृष्टि र सौगातसँगै दिव्य देभ, खगेन्द्र लामिछाने, दयाहाङ राई, मेनुका प्रधान, बुद्धि तामाङ, निश्चल बस्नेतलगायतको अभिनय छ । दुई नेपाली फिल्मसँगै हलमा विजय देवरकोण्डा अभिनित ‘लाइगर’ प्रदर्शनमा आएको छ ।

जगन्नाथ पुरीले निर्देशन गरेको फिल्म ‘लाइगर’मा साउथ स्टार विजय देवरकोन्डा, नायिका अनन्या पाण्डे र राम्या कृष्नानको मुख्य भूमिका रहेको छ । साथै, रोनित रोय, विशु रेड्डी, अली, गेतुप श्रीनुलगायत कलाकारको अभिनय रहेको छ।